საზოგადოებრივ მაუწყებელს ადამიანის უფლებათა ცენტრის სოციალური რეკლამის განთავსება დაევალა. გადაწყვეტილება საქართველოს კომუნიკაციების ეროვნულმა კომისიამ მიიღო, რომლის შესახებაც ინფორმაცია დღეს, 8 აგვისტოს გაავრცელა.

კომისიამ მიიჩნია, რომ ადამიანის უფლებათა ცენტრის მიერ წარმდგენელი სარეკლამო რგოლი სოციალური რეკლამის კატეგორიას მიეკუთვნება, რადგან ოჯახური ძალადობის მსხვერპლთა დახმარება და მათი უფლებების დაცვა საზოგადოებრივი სიკეთის ხელშეწყობაა. კომისიის აზრითვე, ვიდეო რგოლი საზოგადოების ქცევის პოზიტიური თვალსაზრისით შეცვლისკენ და საქველმოქმედო მიზნების მიღწევისკენ იყო მიმართული.

"ვიდეო რგოლი არ შეიცავდა სახელმწიფო ან ადგილობრივი თვითმმართველობის ორგანოს, კერძო ან საჯარო სამართლის იურიდიული პირის მიერ გაწეული მომსახურების რეკლამას. მართალია, ვიდეო რგოლში მითითებული იყო ორგანიზაციის ტელეფონის ნომრები და მისამართები, თუმცა აღნიშნულის მითითება აუცილებელია, იმისთვის რომ საზოგადოებამ უფლებების დარღვევის შემთხვევაში იცოდეს ვის და სად მიმართოს", - განმარტა კომისიამ.

მათვე გაიზიარეს საზოგადოებრივი მაუწყებლის პოზიცია იმის შესახებ, რომ ვიდეორგოლში უნდა დაზუსტებულიყო, რომ ადამიანის უფლებათა ცენტრის მიერ შეთავაზებული სერვისი უფასოა.

ვიდეორგოლი, რომლის სოციალური რეკლამის სტატუსით განთავსებაზეც საზოგადოებრივმა მაუწყებელმა თავდაპირველად უარი თქვა.