თბილისის მერიის ქონების მართვის სააგენტომ მზიურის პარკში 461 კვ.მ მიწის ნაკვეთის და მასზე განთავსებული შენობის — კაფე მზიურის აუქციონზე გატანა გადაწყვიტა. ამის შესახებ ინფორმაცია კაფე მზიურს სახალხო დამცველის აპარატმა მიაწოდა.

ქონების მართვის სააგენტოს წერილში ვკითხულობთ, რომ "უძრავი ქონება შესაფასებლად გადაგზავნილია შესაბამის უწყებაში საბაზრო საიჯარო ღირებულების დადგენის მიზნით".

თბილისის მერიის ქონების მართვის სააგენტოს წერილი

თბილისის მერიის ქონების მართვის სააგენტოს წერილი

კაფე მზიური წერს, რომ "დაელოდებიან აუქციონის პირობების გასაჯაროებას და იმედს იტოვებენ, რომ საკონკურსო პირობები იქნება გამჭვირვალე, თანაბარი და მორგებული შეზღუდული შესაძლებლობების მქონე პირებზე".

"მივიღეთ წერილი საქართველოს სახალხო დამცველის აპარატიდან სადაც გვატყობინებს ჩვენს კაფესთან დაკავშირებულ გადაწყვეტილებას აუქციონის შესახებ. სამწუხაროა, რომ მიუხედავად ჩვენი არაერთი წერილობითი მიმართვისა, თბილისის მერიამ უპასუხოდ დატოვა ყველა ჩვენი კითხვა. ომბუდსმენის აპარატი აღმოჩნდა ერთადერთი საჯარო უწყება, რომელმაც გვამცნო მერიის გადაწყვეტილების შესახებ.

ჩვენ დაველოდებით აუქციონის პირობების გასაჯაროებას. იმედს ვიტოვებთ, რომ საკონკურსო პირობები იქნება გამჭვირვალე, თანაბარი და მორგებული შეზღუდული შესაძლებლობების მქონე პირებზე.

ასევე გათვალისწინებული იქნება ყველა ის ბარიერი რაც შშმ პირებს სხვებთან თანაბარ პირობებში გახდის კონკურენტუნარიანს. როგორც იცით, კაფე მზიური წარმოადგენს სოციალურ საწარმოს (რაც გულისხმობს ფინანსური მოგების სრულ რეინვესტირებას სოციალურ მიზნებში) და გახსნის დღიდან დასახული მიზნების ერთგულია. ამიტომ, ჩვენთვის უმნიშვნელოვანესია ამ სივრცეში არსებულმა კაფემ გააგრძელოს იგივე კონცეფციით მუშაობა.

გაითვალისწინოს ჩვენი საზოგადოების სოციალური პრობლემები და გარემოსდაცვითი საკითხები.

გვინდა გვჯეროდეს, რომ ჩვენი კაფე არ გადაიქცევა მდიდარი ბიზნესმენის მორიგ ობიექტად და წყალში არ ჩაგვიყრის მრავალი წლის მანძილზე ერთობლივი შრომით მიღებულ შედეგს.

გპირდებით, რომ თქვენთან ერთად ბოლომდე ვიბრძოლებთ მზიურის კაფეს გადასარჩენად. მზიური უნდა დარჩეს შეზღუდული შესაძლებლობების მქონე პირების მხარდამჭერ სივრცედ, როგორც თანასწორობის, ინკლუზიის მაგალითი და სხვა არაერთი სასარგებლო ინიციატივის ავტორი.

ეს პატარა კაფე არ არის მხოლოდ შენობა და ერთი საკადასტრო კოდი - ის ვართ ჩვენ!, — წერს კაფე მზიური.