ბათუმში მიმდინარე აზერბაიჯანი-საქართველო-თურქეთის თავდაცვის მინისტერიალის ფარგლებში, საქართველოს თავდაცვის მინისტრი ირაკლი ჩიქოვანი თურქ კოლეგასთან, იაშ გულერთან და აზერბაიჯანელ თავდაცვის მინისტრთან, გენერალ-პოლკოვნიკ ზაქირ ჰასანოვთან შეხვედრას მართავს.

თავდაცვის სამინისტროს ინფორმაციით, ჩიქოვანმა გულერს საქართველოს სუვერენიტეტის, ტერიტორიული მთლიანობისა და ნატო-ში გაწევრიანების გზაზე თურქეთის ურყევი მხარდაჭრისთვის მადლობა გადაუხადა.

სამინისტროს რელიზის ცნობით, საუბარი ასევე შეეხო საქართველოსა და თურქეთს შორის ორმხრივ ფორმატში თანამშრომლობის საკითხებს, მათ შორის, საგანმანათლებლო შესაძლებლობებს, ფინანსურ და მატერიალურ-ტექნიკურ დახმარებასა და საერთაშორისო სწავლებებში ერთობლივ მონაწილეობას.

განცხადებაში წერია, რომ აღინიშნა ნატო-საქართველოს არსებით პაკეტით გათვალისწინებული ინიციატივების გათვალისწინების განხორციელების საქმეში თურქეთის წვლილი.

წყაროს ცნობით, აზერბაიჯანელ კოლეგასთან შეხვედრისას, მინისტრებმა მეზობელ ქვეყნებს შორის არსებული მეგობრული ურთიერთობის, რეგიონში მშვიდობისა და სტაბილურობის ხელშეწყობის მნიშვნელობაზე ისაუბრეს — განიხილეს თავდაცვის სფეროში თანამშრომლობის სირთულეები, მათ შორის, სამხედრო განათლების საკითხებიც.

შეხვედრას საქართველოს თავდაცვის ძალების მეთაური, გენერალ-მაიორი გიორგი მათიაშვილი და თავდაცვის უწყების ოფიციალური პირები, ისევე როგორც თურქეთს დელეგაციის წარმომადგენლებიც დაესწრნენ.