"ევროკავშირმა და სომხეთმა ვიზალიბერალიზაციის შესახებ მოლაპარაკებები დაიწყეს", — ამის შესახებ ევროკომისიის განცხადებაში წერია.

მოლაპარაკებების ფარგლებში სომხეთის პრემიერ-მინისტრი ნიკოლ ფაშინიანი ევროკომისიის ვიცე-პრეზიდენტ, მარგარიტის სხინასს შეხვდა.

ევროკომისიის ოფიციალურ გვერდზე წერია, რომ ეს პროცესი სომხეთს დაეხმარება, რომ შენგენის ტერიტორიაზე მოკლევადიანი უვიზო მიმოსვლა მარტივად და უსაფრთხოდ შეძლონ.

"მოხარული ვარ, რომ ჩვენს ურთიერთობებში შესამჩნევი ცვლილებებია. იწყება მოლაპარაკებები ვიზალიბერალიზაციის შესახებ, მიღებულია ევროპის მშვიდობის ფონდიდან სომხეთის მხარდაჭერის გადაწყვეტილება, რასაც ჩვენ ძალიან ვაფასებთ", — განაცხადა ფაშინიანმა შეხვედრაზე.

მანვე განმარტა, რომ სომხეთში დისკუსიები მიმდინარეობს ქვეყნის ევროკავშირში გაწევრიანებასთან დაკავშირებით, ამიტომაც მნიშვნელოვანია, ევროპელი პარტნიორების დაკვირვებები და რჩევები მოისმინოს.

შეხვედრაზე კომენტარი სხინასმაც გააკეთა. მან სომხეთთან ვიზალიბერალიზაციაზე მოლაპარაკებებში ეფექტური თანამშრომლობის იმედი გამოთქვა და თქვა, რომ ევროკავშირი სომხეთთან ურთიერთობების განვითარებით და ქვეყანაში რეფორმების გატარებითაა დაინტერესებული.