საქართველოს რესპუბლიკურ პარტიაში მიიჩნევენ, რომ GEM Fest-იდან ახალგაზრდების საავადმყოფოში გადაყვანა ეჭვს აჩენს, რომ ხელისუფლება პროცესების ხელოვნურად პროვოცირებას ახდენს. პარტიაში აღნიშნავენ, რომ შესაძლოა, ეს პროცესები საზოგადოებაში შიშის დანერგვას და არსებული სტერეოტიპების გაძლიერებას ემსახურებოდეს. ამის შესახებ რესპუბლიკელების მიერ გავრცელებულ განცხადებაში ვკითხულობთ.

"ანაკლიაში მიმდინარე ფესტივალზე განვითარებული მოვლენები კიდევ ერთხელ ცხადყოფს, რომ სახელმწიფო არ ზრუნავს საკუთარ მოქალაქეებზე, დასჯასა და რეპრესიებზე ორიენტირებულ პოლიტიკას კი წლებია შედეგი არ მოაქვს", - მიიჩნევენ რესპუბლიკელები.

მათივე აზრით, სასიცოცხლოდ მნიშვნელოვანია, შეიცვალოს არსებული ნარკოპოლიტიკა და სახელმწიფოს ორიენტირი გახდეს ადამიანი, მასზე ზრუნვა, მისთვის შესაბამისი სერვისებისა და ინფორმაციის მიწოდების უზრუნველყოფა, რათა მაქსიმალურად შემცირდეს ზიანი.

GEM Fest-ზე 3 აგვისტოს, სავარაუდოდ, ნარკოტიკული საშუალებების ზედოზირების გამო 22 წლის ახალგაზრდა გარდაიცვალა. მას შემდეგ ყოველდღიურად ვრცელდება ინფორმაცია, რომ სავარაუდოდ, ნარკოტიკული საშუალებების ზედოზირების გამო, ფესტივალის სხვადასხვა მონაწილეები გადაჰყავთ საავადმყოფოში.