Student-Youth Council-მა სოციალურ ქსელში განცხადება გაავრცელა. სადაც წერია, რომ CENN-მა მათ ევროკავშირის დაფინანსებული გრანტი იმ მიზეზით არ მისცა, რომ აგენტების რეესტრში არ რეგისტრირდებიან.

"ეს ორგანიზაცია ახორციელებს გურიის რეგიონში ევროკავშირის მიერ დაფინანსებულ LAG პროექტს მწვანე გურია. ამ პროექტის ფარგლებში იყო გამოცხადებული საგრანტო კონკურსი, სადაც ჩვენს ორგანიზაციასაც ჰქონდა შეტანილი პროექტი. მოგვწერეს პირველი ეტაპი გადალახაო და დაზუსტება გვინდაო. დაახლოებით 3 კვირის წინ, ონლაინ შეხვედრა ჩატარდა. კითხვები ძირითადად ეხებოდა ბიუჯეტის კორექტირებას — ფაქტობრივ, ყველა დეტალი გავიარეთ. ავუხსენით და დავაკორექტირეთ. მაგრამ შეხვედრის მიწურულს დაგვისვეს კითხვა, რომელიც პროექტს არ ეხებოდა: ხომ ვრეგისტრირდებით რუსული კანონის შესაბამისად. ჩვენ ვუპასუხეთ, რომ არ ვაპირებდით და ამაზე დაგვიწყეს "ჭკუის სწავლება", რომ აუცილებლად უნდა დავრეგისტრირდეთ და რომ წინააღმდეგ შემთხვევაში ვერ მივიღებთ გრანტს.

3 დღის წინ მივიღეთ წერილი — ჩვენი პროექტი არ დაფინანსდა. პასუხად მივწერეთ და ვთხოვეთ, რომ გამოგვიგზავნონ საგრანტო კომისიის გადაწყვეტილება — ეს ყველაზე მარტივი საქმეა, არსებული გადაწყვეტილების მიბმა წერილზე, მაგრამ პასუხი დღესაც არ არის.

European Union in Georgia დარეგისტრირდება/არ დარეგისტრირდება რომელიმე ორგანიზაცია ეს მისი გადასაწყვეტია ! მაგრამ არ დარეგისტრირების მიზეზით თქვენს მიერ დაფინანსებული პროექტის ფარგლებში გრანტის არ გაცემა ეს მგონი არ არის ნორმალური", — ნათქვამია Student-Youth Council-ის განცხადებაში.

ცნობისათვის, დღეს CENN-მა გაავრცელა განცხადება, სადაც წერის, რომ კომპანიამ "მიიღო მძიმე, მაგრამ ამ ეტაპისათვის საჭირო გადაწყვეტილება, შეასრულოს კანონით დაკისრებული რეგისტრაციის მოთხოვნა და გააგრძელოს ადვოკატირება და ბრძოლა უფრო დემოკრატიული და თავისუფალი მომავლის შექმნისათვის საქართველოში”.