მიუნხენის აეროპორტში, რუსული კანონის მოწინააღმდეგე მოქალაქე, ქართული ოცნების დეპუტატს დავით მათიკაშვილს სიტყვიერად დაუპირისპირდა და მას მოღალატე უწოდა, — ფაქტის ამსახველი ინფორმაცია და ვიდეო მოქალაქე ნინო შველიძემ სოციალურ ქსელში გამოაქვეყნა.

"ეს არის მოკლე ვიდეო, სრული მხილება ამ მოღალატის არ გადამიღია. "მადლობას მეტყვითო" — ისეა დარწმუნებული თავის საქციელის სიკეთეში როგორც კიტოვანი სიცოცხლის ბოლომდე თავის საქციელის სისწორეში.
ყველაზე მეტად საინტერესო ის იყო, რომ "მონა" არც მითქვია თავად იძახდა თავის სახელს. ჩემი შვილების ხსენებით თავს იცავდა, მაშინ როცა შვილი გვერდით უზის და მე არც ერთი წამი მის შვილს არ შევხებივარ.
და ბოლოს "ფუი ეშმაკს"- ვუთხარი და დაცინვით მიპასუხა - აბა ეხლა პირჯვარი გადაიწერეო (ფარისეველი).
მე პირადად დიდი სტრესი განვიცადე, ამ მოღალატეს გამო მე ბევრჯერ დავზარალდი პროტესტზე იმის გამო, რომ ეს მშვიდად წასულიყო სახლში და უფალმა მიუნხენში შემახვედრა. რომ ხმა არ ამომეღო ჩემ თავს არ ვაპატიებდი." — წერს მოქალაქე სოციალურ ქსელში

მოგვიანებით ფაქტს თავად დეპუტატიც გამოეხმაურა:

"მიუნხენის აეროპორტში თავს დამესხა ქალბატონი, რომელმაც თავი "რიგით მოქალაქედ" გაასაღა. როგორც მოგვიანებით გაირკვა, "რიგითი აღშფოთებული" მოქალაქე რადიკალური ოპოზიციის აქტივისტი ნინო შველიძე აღმოჩნდა" — აცხადებს დეპუტატი.