მოძრაობა სირცხვილია აპირებს, უცხოური გავლენის გამჭვირვალობის შესახებ კანონის (რუსული კანონის) ფარგლებში შექმნილ უცხო ქვეყნის ინტერესების გამტარებელი ორგანიზაციების რეესტრში დარეგისტრირდეს. ამის შესახებ ორგანიზაციის ფეისბუკ გვერდზე გამოქვეყნებულ 9-წუთიან ვიდეოშია ნათქვამი.

Facebook-ში გავრცელებულ ვიდეოში სირცხვილიას წევრები ხსნიან მიზეზებს, თუ რატომ მიიღეს რუსულ კანონს დაქვემდებარების და რეგისტრაციის გადაწყვეტილება.

"კანონის ახალი რედაქციით, აგენტის სტატუსი კანონში გათვალისწინებული არ არის, ამიტომ რეგისტრაცია ან არ რეგისტრაცია, მაინცდამაინც იმას არ განაპირობებს, აგენტის სტატუსს მიიღებს თუ არა ორგანიზაცია. ეს ისევ დამოკიდებული არის ხელისუფლების პროპაგანდაზე", — ნათქვამია სირცხვილიას წევრების საერთო ვიდეომიმართვაში.

ორგანიზაციის წევრების განცხადებით, რუსული კანონის დარღვევისთვის დაწესებული ჯარიმები სირცხვილიას გაკოტრებამდე მიიყვანს, ორგანიზაცია ვეღარ შეძლებს საქმიანობის გაგრძელებას და ეს სწორედ ის არის, რაც ხელისუფლებას უნდა.

შეგახსენებთ, რომ მოძრაობა სირცხვილია აქტიურად იყო ჩართული რუსული კანონის საწინააღმდეგო საპროტესტო აქციებში. ვიდეოს გამოქვეყნება კი ემთხვევა საკონსტიტუციო სასამართლოში რუსული კანონის განხილვის პროცესს.