ისრაელის მუზეუმში ოთხი წლის ბიჭმა შემთხვევით 3500 წლის ჭურჭელი გატეხა.

ჰაიფას ჰეხტის მუზეუმმა BBC-ს განუცხადა, რომ ჭურჭელი ბრინჯაოს ხანისაა და დაახლოებით 2200-1500 წლით თარიღდება. ეს ჭურჭელი უნიკალური და იშვიათი არტეფაქტი იყო, ვინაიდან, არქეოლოგებმა იგი დაუზიანებელ მდგომარეობაში აღმოაჩინეს.

აღნიშნული ჭურჭელი მუზეუმის შესასვლელთან დამცავი მინის გარეშე იყო გამოფენილი, რადგან მუზეუმი თვლის, რომ არქეოლოგიური აღმოჩენების დამთვალიერებლებისთვის ამგვარად ჩვენებას განსაკუთრებული ხიბლი აქვს.

ბიჭის მამამ, ალექსმა, თქვა, რომ მისმა შვილმა "ქილას თავსახური ახადა", რადგან "აინტერესებდა რა იყო შიგნით", რის გამოც ჭურჭელი გადმოვარდა და გატყდა.

ჰეხტის მუზეუმში აცხადებენ, რომ რამდენიმე დღის წინ მომხდარი ინციდენტის შემდეგ ბავშვი ოჯახთან ერთად ორგანიზებულ ტურზე მიიწვიეს.

"არსებობს შემთხვევები, როდესაც ექსპონატებს განზრახ აზიანებენ და ასეთ დროს მკაცრ ზომებს მივმართავთ, მათ შორის პოლიციასაც, ამ შემთხვევაში კი ეს ასე არ იყო. ქილა მუზეუმში მისულმა მცირეწლოვანმა ბავშვმა შემთხვევით დააზიანა, რის გამოც ზემოთ ნახსენებ ზომებს არ მივმართავთ" — განუცხადა BBC-ს მუზეუმის წარმომადგენელმა ლიჰი ლასლომ.

ქილის აღსადგენად სპეციალისტებმა უკვე დაიწყეს მუშაობა და ის უმოკლეს დროში თავის პირვანდელ სახეს დაუბრუნდება.

ფოტო: BBC