ლიამ და ნოელ გალაგერებმა Oasis-ის ერთგულ ფანებს ბენდის შესაძლო დაბრუნებაზე აუწყეს. ორივე ძმის სოციალურ ქსელებში გამოჩნდა პოსტები ბენდის ცნობილი ლოგოთი და ფონტით, რომელზეც თარიღი "27.08.24" წერია.

ლეგენდარული როკჯგუფი 1991 წელს ჩამოყალიბდა და სახელი ისეთი საერთაშორისო ჰიტებით გაითქვა, როგორებიცაა Wonderwall, Don't Look Back In Anger, Stop Crying Your Heart Out და ა.შ. ძმებს შორის არსებული დაძაბულობისა და შეუთავსებელი სამუშაო ეთიკის გამო ბენდი 2009 წელს დაიშალა.

Sunday Times-ის მიხედვით, გალაგერებთან დაახლოებული პირების ცნობით შემდეგ წელს Oasis ტურს ჩაატარებს, კონცერტები კი ლონდონის უემბლის სტადიონზე და მანჩესტერის ჰიტონის პარკშიც ჩატარდება. ვრცელდება ჭორები გლასტონბერის ფესტივალში Oasis-ის მონაწილეობის შესახებაც.