ძლიერმა წვიმამ რიკოთის უღელტეხილზე პრობლემები შექმნა — საავტომობილო დეპარტამენტის ცნობით მოძრაობა ძლიერის წვიმის შედეგად გზის სავალ ნაწილზე ჩამოსული წყლისა და ლაფის გამო შეზღუდული იყო.

"რიკოთის უღელტეხილზე მოძრაობა დროებით შეიზღუდა ძლიერი წვიმის შედეგად გზის სავალ ნაწილზე ჩამოსული წყლისა და ლაფის გამო. გაწმენდითი სამუშაოების დასრულებისთანავე ავტოტრანსპორტის მოძრაობა აღდგა," — ნათქვამია საავტომობილო გზების დეპარტამენტის განცხადებაში

ფოტო: ქალაქის პრობლემები / Facebook Group

სოციალურ ქსელში მოქალაქეები წერენ, რომ მოძრაობა ჯერ კიდევ არ გახსნილა და გზაზე ისევ საცობია. ფაქტს Facebook-ზე გამოეხმაურა ომბუდსმენის ყოფილი მოადგილე გიორგი ბურჯანაძეც, მისი თქმით ის თითქმის 5 საათია საცობში დგას.

"მეხუთე საათია რიკოთზე ვდგავართ და ერთი პატრული არ გამოჩენილა, გზების დეპარტამენტმა არ იცის როდის გაიხსნება გზა, რომელიც ორჯერ დაეტბორათ თუ რაღაც მოუვიდაო. 112-მა არაფერი ვიცითო.

ავტობუსები, ხალხი, ბავშვები - საშინელი საყურებელია." — წერს გიორგი ბურჯანაძე.

NEWS.On.ge მეტი დეტალის გარკვევას ცდილობს. პასუხების მიღების შემთხვევაში მასალა განახლდება.