აჭარის მთავრობის თავმჯდომარე, თორნიკე რიჟვაძემ აჭარის უმაღლეს საბჭოში ქართული ოცნების დელეგატები წარადგინა — წარდგენილი ექვსივე დელეგატიდან, ექვსივე კაცია.

აჭარაში, დელეგატთა სია ასე გამოიყურება:

ბათუმი — ბათუმის საკრებულოს თავმჯდომარე, რამაზ ჯინჭარაძე

ქობულეთი — აჭარის უმაღლესი საბჭოს მოქმედი დეპუტატი, ცოტნე ანანიძე

ხელვაჩაური — ხელვაჩაურის საკრებულოს თავმჯდომარის პირველი მოადგილე, მინდია დიასამიძე

ქედა — აჭარის ფინანსთა და ეკონომიკის მინისტრის მოადგილე, მამუკა თურმანიძე

შუახევი — აჭარის უმაღლესი საბჭოს მოქმედი დეპუტატი, ფრიდონ ფუტკარაძე

ხულო — ხულოს მოქმედი მერი, ვახტანგ ბერიძე.

ცნობისთვის, დელეგატი საარჩევნო სიაში მმართველი პარტიის ინიციატივა და მაჟორიტარის ალტერნატივაა — რადგანაც 2024 წლის საპარლამენტო არჩევნები სრულად პროპორციული წესით ტარდება.

საარჩევნო კოდექსში მიმდინარე წლის 15 მაისს შეტანილი ცვლილებების თანახმად, პარტიას უფლება აქვს, საპარლამენტო სიაში შეყვანილი პირი საარჩევნო ოლქის ტერიტორიაზე რეგისტრირებულ ამომრჩეველთა დელეგატად განსაზღვროს.

თუმცა, უცნობია, რა ადგილს დაიკავებს პარტიულ სიაში ესა თუ ის დელეგატი და მოხვდება თუ არა პარლამენტში იმ შემთხვევაშიც კი, თუ ამა თუ იმ ოლქში მისი პარტია გაიმარჯვებს. ირაკლი კობახიძემ თქვა, რომ დასახელებული დელეგატები პარტიის "გამსვლელ სიაში" იქნებიან.