საქართველო თურქეთს ახალი მაგისტრალით და გვირაბით დაუკავშირდება. ზღვის სანაპიროს მომიჯნავედ გზა ახალი ასფალტ-ბეტონის გზით ჩანაცვლდება, რომელიც მდინარე ჭოროხზე ახალი ხიდით დაუკავშირდება ბათუმის შემოვლით გზას, რომლის მშენებლობა მიმდინარე წელს უნდა დასრულდეს.

საავტომობილო გზების დეპარტამენტის მიერ გარემოსდაცვით საინფორმაციო პორტალზე ატვირთულ დოკუმენტაციაში, სკოპინგის ანგარიშის თანახმად, საპროექტო გზის ჯამური სიგრძე 11,4 კმ-ია.

პროექტის ფარგლებში დაგეგმილია: კვანძის, 3 სახიდე გადასასვლელის და ორზოლიანი გვირაბის მშენებლობა, ასევე გზის ბოლო მონაკვეთზე, სოფელ სარფის ტერიტორიაზე არსებულ გზაზე, იგეგმება გაფართოებითი სამუშაოების განხორციელება. საპროექტო გზის დერეფანი მდინარე ჭოროხის მარჯვენა სანაპიროდან კვანძის მოწყობით იწყება, შემდგომ გზა სახიდე გადასასვლელით გრძელდება, რომელიც მდინარე ჭოროხზე მოეწყობა.

ხიდის შემდეგ, სოფელ ჭარნალთან საპროექტო გზის დერეფანი 7,6 კმ სიგრძის გვირაბით გაგრძელდება, რომელიც სოფლების ჭარნალისა და ახალსოფლის ტერიტორიებზე გაივლის. გვირაბის შემდეგ გზა სარფის მიმართულებით გრძელდება და ხიდის მეშვეობით, სარფის ტერიტორიაზე არსებულ (საერთაშორისო მნიშვნელობის E70) საავტომობილო გზას უერთდება, სადაც გზის სავალი ნაწილის გაფართოება მოხდება საქართველო-თურქეთის საზღვრამდე.