საქართველოს რკინიგზა ეხმაურება თავისუფლების ინსტიტუტის მიერ 2024 წლის 20 აგვისტოს გავრცელებულ ინფორმაციას და განმარტავს, რომ სტატიაში წარმოდგენილი ინფორმაცია სიცრუეა. მათი განმარტებით, სტატიაში წარმოდგენილი ინფორმაცია, თითქოს საქართველოს ბიუჯეტიდან 80 519 105 დოლარის ანაზღაურება განხორციელდა, აბსურდული ბრალდებაა და სიმართლეს არ შეესაბამება.

საქართველოს რკინიგზის მიერ გავრცელებულ განცხადებაში ნათქვამია, რომ კომპანია შპს გეორგიას მუდმივი დენის მაგისტრალური ელმავლების მომწოდებელ ქარხანად შემოთავაზებული ჰყავდა რუსეთის ფედერაციაში რეგისტრირებული კომპანია სს ურალსკიე ლოკომიტივი. თუმცა, მას შემდეგ, რაც საქართველოს რკინიგზისთვის ცნობილი გახდა, რომ ჰოლდინგი სინარა — ტრანსპორტნიე მაშინი (რომლის შემადგენლობაშიაცაა ზემოაღნიშნული ქარხანა) აშშ-ს ხაზინის დეპარტამენტის უცხოური აქტივების კონტროლის ოფისის ე.წ. სპეციალურ ბლოკირებულ პირთა სიაში იყო შეტანილი, საქართველოს რკინიგზის დირექტორთა საბჭომ ხელშეკრულება შეწყვიტა და მასთან არანაირი სამართლებრივი ურთიერთობა აღარ აქვს.