არასამთავრობო ორგანიზაციებისა და იურისტების ნაწილი მიიჩნევენ, რომ საქართველოს კონსტიტუციის პროექტში, რელიგიასთან დაკავშირებით არსებული ჩანაწერით, საფრთხე ექმნება რელიგიის თავისუფლებას. მათ 2 აგვისტოს საქართველოს პარლამენტს, საქართველოს პრეზიდენტს, ვენეციის კომისიას, გაეროს ადამიანის უფლებათა კომიტეტის სპეციალურ მომხსენებელს რელიგიის საკითხებში, ევროპის საბჭოს მინისტრთა კომიტეტსა და ევროპულ კომისიას რასიზმისა და შეუწყნარებლობის წინააღმდეგ (ECRI) კომისიას მიმართეს.

ხელმომწერების განცხადებით, კონსტიტუციის ცვლილებების პროექტის მე-16 მუხლის მეორე პუნქტში, რელიგიის თავისუფლების შეზღუდვის ფარგლები ზედმეტად გაფართოვდა. მათი განმარტებით, პროექტით გათვალისწინებული შეზღუდვის ისეთი საფუძვლები, როგორიცაა სახელმწიფო უსაფრთხოება, დანაშაულის თავიდან აცილება და მართლმსაჯულების განხორციელება, რელიგიის თავისუფლებაში ზოგადი საფუძვლებით უხეში ჩარევის რისკებს წარმოშობს ყველა რელიგიური გაერთიანებისთვის.

"სახელმწიფომ რწმენისა და აღმსარებლობის თავისუფლება შემოზღუდა მართლმადიდებელი ეკლესიის წვლილის აღიარებით, რაც უფლებრივი თვალსაზრისით, სტანდარტის გაუარესებისკენ გადადგმული ნაბიჯია", - აღნიშნავენ ხელმომწერები.

ისინი მიმართვაში აღნიშნავენ, რომ ადრესატებმა შესაბამისი ზომები გამოიყენონ, რათა საქართველოს კონსტიტუციური ცვლილებების ფარგლებში, რელიგიის თავისუფლების დაცვის სტანდარტების არ გაუარესდეს.

მიმართვის სრული ვერსია.

ხელმომწერები:

• ტოლერანტობის და მრავალფეროვნების ინსტიტუტი;
• საქართველოს ახალგაზრდა იურისტთა ასოციაცია;
• საქართველოს გაეროს ასოციაცია;
• ადამიანის უფლებათა ცენტრი;
• საქართველოს რეფორმების ასოციაცია;
• საქართველოს დემოკრატიული ინიციატივა;
• მედიის განვითარების ფონდი;
• თანასწორობის მოძრაობა;
• იდენტობა;
• პარტნიორობა ადამიანის უფლებებისთვის;
• ილიას სახელმწიფო უნივერსიტეტის მართლმსაჯულების გაძლიერებისა და სამართლებრივი განათლების ცენტრი;
• ილიას სახელმწიფო უნივერსიტეტის კონსტიტუციური კვლევების ცენტრი;
• თბილისის თავისუფალი უნივერსიტეტის ადამიანის უფლებათა ეროვნული ინსტიტუტი;
• კონსტანტინე კუბლაშვილი, ილიას უნივერსიტეტის პროფესორი, ილიას სახელმწიფო უნივერსიტეტის მართლმსაჯულების გაძლიერებისა და სამართლებრივი განათლების ცენტრის ხელმძღვანელი;
• დავით ზედელაშვილი, კონსტიტუციონალისტი;
• გიორგი მელაძე, ილიას სახელმწიფო უნივერსიტეტის პროფესორი;
• ლევან რამიშვილი, ილიას სახელმწიფო უნივერსიტეტის სამართლის სკოლის პროფესორი;
• თამარ გურჩიანი, ილიას სახელმწიფო უნივერსიტეტის სამართლის სკოლის ასოცირებული პროფესორი;
• გიორგი ბურჯანაძე, სამართლის მაგისტრი;
• გიორგი ჩიტიძე, იურისტი.