ამერიკის შეერთებული შტატების სენატორის, ჯინ შაჯინის და კონგრესმენ, მაიკლ ტერნერის ვიზიტი საქართველოში დასრულდა.

ვიზიტის ფარგლებში ისინი შეხვდნენ საქართველოს პრეზიდენტ სალომე ზურაბიშვილს, პრემიერ- მინისტრ ირაკლი კობახიძეს, საგარეო საქმეთა მინისტრ ილია დარჩიაშვილსა და თავდაცვის მინისტრს ირაკლი ჩიქოვანს. ამერიკელმა პოლიტიკოსებმა, ღრმა შეშფოთება გამოხატეს საქართველოს საგარეო კურსის ცვლილების მცდელობების საკითხზე და დემოკრატიულ უკუსვლაზე.

ამერიკელმა სტუმრება, რუსეთის საქართველოში შემოჭრის 16 წლისთავი სამხრეთ ოსეთთან, საოკუპაციო ზოლის მონახულებით აღნიშნეს, რითაც კიდევ ერთხელ დაადასტურეს საქართველოს ტერიტორიული მთლიანობისა და უსაფრთხოების მხარდაჭერა.

შაჰინისა და ტერნერის ვიზიტის მთავარ მიზეზად, ორ ქვეყანას შორის არაერთი მიმართულებით თანამშრომლობის დროებით შეჩერება სახელდება.

შეგახსენებთ, საქართველოს მთავრობის ანტიდემოკრატიული ნაბიჯების საპასუხოდ, აშშ-მა ერთობლივი სამხედრო სწავლება ღირსეული პარტნიორი "განუსაზღვრელი ვადით" გადადო, ასევე დახმარების ნაწილი შეუჩერა დაავადებათა კონტროლისა და პრევენციის ცენტრს და ლუგარის ლაბორატორიას.



ჯინ შაჰინისა და მაიკლ ტერნერის კომენტარები ვიზიტის შემდეგ:

„ისეთი ავტორიტარული ქვეყნების მზარდი აგრესიის ფონზე, როგორიც რუსეთია და რომელიც საქართველოში 16 წლის წინ შეიჭრა, მნიშვნელოვანია, კიდევ ერთხელ დავადასტუროთ შეერთებული შტატების მტკიცე მხარდაჭერა ქართველი ხალხის უფლებისა, რომ ჰქონდეთ ქვეყანა, რომელსაც შეუძლია თავად განსაზღვროს საკუთარი მომავალი.

ჩვენი შეხვედრების დროს მთავრობის მაღალჩინოსნებთან და სამოქალაქო საზოგადოების ორგანიზაციებთან კიდევ ერთხელ გავუსვით ხაზი, რომ მხარს ვუჭერთ ქართველი ხალხის ევროინტეგრაციისკენ მისწრაფებას. მაგრამ მკაფიოდ აღვნიშნეთ ასევე, რომ თვალს არ დავხუჭავთ დემოკრატიული განვითარების გზიდან განდგომაზე და შტატებისკენ მიმართულ ცრუ ბრალდებებზე. ჩვენ უნდა გავხდეთ მოწმენი თავისუფალი და სამართლიანი არჩევნებისა ოქტომბერში. ჩვენ უნდა ვიხილოთ კეთილსინდისიერი შრომა უცხოური აგენტების შესახებ კანონის გასაუქმებლად, რადგანაც მას უფრო მეტი ზიანი მოაქვს, ვიდრე სარგებელი ქვეყნისთვის ევროკავშირის წევრობისკენ მიმავალ გზაზე. პირველი ნაბიჯი საიმისოდ, რომ კალაპოტს დავუბრუნდეთ, საქართველოს მთავრობამ უნდა გადადგას და ჩვენ ველით მათ წინადადებებს“, — ამბობს სენატორი ჯინ შაჰინი

„აშშ-ისა და საქართველოს ურთიერთობები ისტორიულად ერთ-ერთი ყველაზე მტკიცე იყო რეგიონში. თუმცა ბოლოდროინდელი მოვლენები, რომლებიც დემოკრატიული ღირებულებების წინააღმდეგ არის მიმართული, ძლიერ შეშფოთებას იწვევს აშშ-სა და ევროკავშირში. მე და სენატორმა შაჰინმა მკაფიოდ განვაცხადეთ, რომ ეს შეშფოთება აშშ-ის ორივე პარტიასა და ორივე პალატაში საერთოა.

აშშ-ის პოლიტიკა საქართველოს მიმართ არ შეიცვლება შტატების ადმინისტრაციის ცვლილებით.

გარდაუვალად აუცილებელია, რომ საპარლამენტო არჩევნები ოქტომბერში იყოს თავისუფალი, სამართლიანი და გამჭვირვალე, როგორც ქართველი ხალხისთვის, ისე საერთაშორისო დამკვირვებლებისთვის. მადლიერი ვარ სენატორი შაჰინის მისი ურყევი ერთგულების გამო აშშ-ისა და საქართველოს ურთიერთობების მიმართ და კიდევ მიწვევისთვის, რომ საქართველოს ამ კრიტიკულ დროს მასთან ერთად ვსტუმრებოდი“, — განაცხადა კონგრესმენმა მაიკ ტერნერმა.