ბანგლადეშში, პოლიციასა და ანტისამთავრობო დემონსტრანტებს შორის კვირას მომხდარ დაპირისპირებას, სულ მცირე 90 ადამიანი ემსხვერპლა — ინფორმაციას BBC ავრცელებს.

სამართალდამცავების ცნობით, 13 პოლიციელი დაიღუპა, როდესაც ათასობით ადამიანი სირაჯგანჯის რაიონში პოლიციის განყოფილებას დაესხა თავს. დაღუპულები და დაშავებულები არიან ქვეყნის სხვა ნაწილებშიც, მათ შორის ჩრდილოეთ რაიონებში : ბოგრაში, პაბნასა და რანგპურში.

ათასობით ადამიანი ყოველდღიურად იკრიბება დედაქალაქ დაკას მთავარ მოედანზე;

ცნობისთვის, ბანგლადეშში საპროტესტო აქციები სამთავრობო სტრუქტურებში კვოტების სისტემის წინააღმდეგ, ერთ თვეზე მეტია გრძელდება. საპროტესტო მოძრაობის დაწყების შემდეგ დაღუპულთა საერთო რაოდენობა 280-ს აღემატება.

კვოტირების სისტემით, სამუშაო ადგილების დაახლოებით 30 პროცენტი გამოიყოფა ყოფილი სამხედრო პერსონალის შთამომავლებისთვის, რომლებიც 1971 წელს პაკისტანის წინააღმდეგ ქვეყნის დამოუკიდებლობისთვის იბრძოდნენ. უფრო მცირე კვოტა გამოიყოფა ქალებისთვის, შშმ პირებისთვის და ღარიბი უბნების მოსახლეობისთვის. კვოტირების მოწინააღმდეგეების მტკიცებით, სისტემა დისკრიმინაციულია და სარგებელი მოაქვს პრემიერ-მინისტრ შეიხ ჰასინას მხარდამჭერებისთვის, რომლის პარტია "ავამი ლიგა" ხელმძღვანელობდა დამოუკიდებლობის მოძრაობას და ხელისუფლებაშია ბოლო 15 წლის განმავლობაში.