თურქეთში Instagram დაიბლოკა — ინფორმაციას Euronews თურქულ მედიაზე დაყრდნობით ავრცელებს.

"instagram.com გაუქმებულია გადაწყვეტილებით, რომელიც თარიღდება 02/08/2024-ით", - ნათქვამია უწყების ვებგვერდზე, მიზეზები და აღდგენის დრო ცნობილი არ არის.

Instagram-ის თურქი მომხმარებლები აპლიკაციაში გაჩენილი ხარვეზების შესახებ უკვე წერენ.

საქმე ისაა, რომ, რამდენიმე დღით ადრე, თურქეთის კომუნიკაციების დირექტორატის ხელმძღვანელმა, ფაჰრეტინ ალთუნმა Instagram გააკრიტიკა და განაცხადა, რომ პლატფორმა ხალხს ჰამასის ლიდერის, ისმაილ ჰანიეს მკვლელობის შემდეგ, სამძიმრის პოსტების გამოქვეყნების საშუალებას არ აძლევდა.

ისმაილ ჰანიე კი თურქეთის პრეზიდენტის, რეჯეფ თაიფ ერდოღანის ახლო მოკავშირედ ითვლებოდა, ვიდრე ის თეირანში, ისრაელის თავდასხმის შედეგად დაიღუპებოდა. ალთუნმა სამძიმრის აკრძალვას Meta-ს მიერ თურქი მომხმარებლის ცენზურის მცდელობა უწოდა.

ადგილობრივი მედიის ინფორმაციით, 85-მილიონიანი მოსახლეობიდან, თურქეთში Instagram-ით 50 მილიონი ადამიანი სარგებლობდა.