საარბიტრაჟო სასამართლოს გადაწყვეტილებით, ანაკლიის განვითარების კონსორციუმის (ADC) სარჩელზე, პარტია ლელოს ლიდერს, მამუკა ხაზარაძეს საქართველოს მთავრობის სასარგებლოდ, 650 ათასი დოლარის გადახდა დაეკისრა.

ამის შესახებ დღეს, 30 ივლისს, საქართველოს იუსტიციის მინისტრმა რატი ბრეგაძემ განაცხადა.

"საარბიტრაჟო მოსარჩელე სადავოდ ხდიდა საინვესტიციო ხელშეკრულების შეწყვეტის კანონიერებასა და ითხოვდა დაახლოებით 1.5 მლრდ დოლარის ოდენობის კომპენსაციას, თუმცა, არბიტრაჟმა დაადასტურა, რომ საქართველოს მთავრობამ საინვესტიციო ხელშეკრულება შეწყვიტა კანონიერად და მოსარჩელის მოთხოვნა, მილიარდ ნახევარი დოლარის ანაზღაურებაზე სრულად უარყოფილ იქნა, პირიქით, მოსარჩელეს საქართველოს მთავრობის სასარგებლოდ დაეკისრა 650 ათასი დოლარის გადახდის ვალდებულება", — თქვა ბრეგაძემ.

მამუკა ხაზარაძემ და ბადრი ჯაფარიძემ, ანაკლიის პორტის საქმეზე, ანაკლიის განვითარების კონსორციუმის დაწყებული დავა, საერთაშორისო საარბიტრაჟო სასამართლოში, წააგეს.

"არბიტრაჟის მიერ მიღებული გადაწყვეტილება გულდასაწყვეტია. ჩვენ კვლავაც გვჯერა, რომ საქართველოს მთავრობა მოქმედებდა არასწორად, საქართველოს მოქალაქეების ინტერესების საზიანოდ, როდესაც ცდილობდა ანაკლიის პორტის პროექტისთვის ზიანის მიყენებას, რამაც შედეგად გამოიწვია პორტის პროექტის თითქმის ათწლეულით დაყოვნება, ათასობით სამუშაო ადგილისა და შემოსავლების დაკარგვა საქართველოსთვის", — ვკითხულობთ ADC-ის განცხადებაში.

გაიგე მეტი: საარბიტრაჟო სასამართლომ, ანაკლიის პორტზე ხაზარაძე-ჯაფარიძის სარჩელი არ დააკმაყოფილა