ბარბის მრავალფეროვანი სამყარო კიდევ უფრო ფართოვდება — ბარბის შემქმნელმა კომპანიამ Mattel პირველი უსინათლო ბარბი და დაუნის სინდრომის მქონე შავკანიანი ბარბი წარმოგვიდგინა.

უსინათლო და დაუნის სინდრომის მქონე ბარბები

ფოტო: Mattel

უსინათლო ბარბის დამზადების პროცესში კომპანია ამერიკის უსინათლოთა ფონდთან (AFB) თანამშრომლობდა, რათა დარწმუნებულიყო, რომ თოჯინა ზუსტად ასახავდა იმ ინდივიდებს, რომელთაც ხედვასთან დაკავშირებული პრობლემები აქვთ. უსინათლო ბარბის სახელი ბრაილით აწერია, აცვია ვარდისფერი მაისური, იისფერი ქვედაბოლო, უკეთია მოდური და ფუნქციური სათვალე და უჭირავს ყავარჯენი.

ფოტო: Mattel

გასულ წელს Mattel-მა ამერიკის ეროვნულ დაუნის სინდრომის საზოგადოებასთან (NDSS) კოლაბორაციით პირველი დაუნის სინდრომის მქონე ბარბი შექმნა, წელს კი რასობრივ ინკლუზიურობაზე მეტად იზრუნა და შავკანიანი დაუნის სინდრომის მქონე ბარბიც წარმოგვიდგინა.

დაუნის სინდრომის მქონე ბარბი

ფოტო: Mattel

"NDSS ძალიან დიდი სიხარულით წარმოგიდგენთ რიგით მეორე დაუნის სინდრომის მქონე ბარბის. მისი და უსინათლო ბარბის გამოშვებით კიდევ ერთი მნიშვნელოვანი ნაბიჯი გადაიდგა შეზღუდული უნარების მქონე საზოგადოების ფართო აუდიტორიისთვის გაცნობისკენ. სიამაყით ვპარტნიორობთ ბარბისთან, რადგან ის ასახავს ჩვენს მრავალფეროვან და ლამაზ სამყაროს," — განაცხადა კანდი პიკარდმა, NDSS-ის პრეზიდენტმა.