ინტერნეტში ერთი ცნობილი მიმი არსებობს: ადელი რომ ექვსი თვე მუშაობს და მერე შვიდი წლით იკარგება, ეგეთი სამსახური მინდაო. ინგლისელი მუსიკოსი, სხვა ყველაფერთან ერთად, იმითაცაა ცნობილი, რომ ალბომებს შორის დროის დიდ შუალედებს იცავს და ამ ინტერვალებს ყოველ ჯერზე ზრდის. ჰოდა, რა გასაკვირია, რომ მუსიკოსი ახლო მომავალში ახალი მუსიკით ფანების გაოცებას არ აპირებს.

ადელი, რომელიც ამჟამად მიუნხენში კონცერტების გასამართად ემზადება, გერმანულ ტელეარხ ZDF-თან ინტერვიუში ამბობს, რომ შესვენება სურს, თანაც — დიდი ხნით.

"ახალი მუსიკის გამოშვებას საერთოდაც არ ვგეგმავ", — ამბობს მუსიკოსი, — "ამის [მიმდინარე კონცერტების] დასრულების შემდეგ დიდი პაუზის აღება მინდა. მსურს, სხვა შემოქმედებითი საქმით დავკავდე, ცოტა ხნით მაინც".

2022 წლის ნოემბერში ადელმა ლას-ვეგასში კონცერტების სერია უქმეები ადელთან ერთად წამოიწყო. სერია, რომელიც ყოველ შაბათ-კვირას ორ-ორ კონცერტს მოიცავს, მუსიკოსმა 2024 წლის ნოემბრამდე გაახანგრძლივა. სხვათა შორის, წლის დასაწყისში, ერთ-ერთ საშაბათკვირო კონცერტზეც განაცხადა ადელმა, რომ ახალი ალბომის დაწერას კიდევ "კარგა ხანს" არ აპირებს.

"ვღელავ, კონცერტებზე ხმა არ გადამეღალოს", — ასე უპასუხა მუსიკოსმა The Hollywood Reporter-ის შეკითხვას შარშან დეკემბერში, მოიცალა თუ არა ახალი მუსიკისთვის, — "ბევრს ვმღერი, მთლიანად ცოცხლად, მთელი ორი საათი. ეს ბევრია. თან მე კიდევ უთავბოლოდ ვლაქლაქებ ხოლმე. თუმცა, სათქმელი ჯერ არაფერი მაქვს. ამაზე არც კი მიფიქრია".

ადელის ამ დროისთვის ბოლო, რიგით მეოთხე სტუდიური ალბომი, სახელწოდებით 30, ექვსწლიანი მოლოდინის შემდეგ 2021-ში გამოვიდა. ნამუშევარი გრემის ექვს ნომინაციაზე იყო წარდგენილი, მათ შორის, საუკეთესო ალბომის კატეგორიაში. 30 ოცდახუთი ქვეყნის ჩარტების სათავეშიც აღმოჩნდა და წლის ყველაზე გაყიდვადი ალბომი გახდა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...