პლატფორმა ერთიანობის ლიდერის, თამარ კორძაიას განცხადებით, რუსულ კანონს საკონსტიტუციო სასამართლოში პრეზიდენტთან ერთად, პარლამენტის წევრებიც გაასაჩივრებენ.

კორძაიას განცხადებით, სარჩელს შეიტანენ კონსტიტუციის 78-ე და 22-ე მუხლის დარღვევაზე, რაც, მისი თქმით, გულისხმობს გაერთიანების თავისუფლების შეზღუდვას და ევროკავშირისკენ მიმავალი გზის განადგურებას.

"პარლამენტის წევრებმა ჩავთვალეთ, რომ სასიცოცხლოდ მნიშვნელოვანია 78-ე მუხლის აღსრულებაში ჩვენც მივიღოთ მონაწილეობა, რადგან ვთვლით, რომ 78-ე მუხლის დაწესებული ეს ბრძოლა ევროკავშირისთვის არის ჩვენი ვალდებულებაც, რადგან იქ წერია, რომ ყველა სახელმწიფო დაწესებულება ვალდებულია, რომ გააკეთოს ყველაფერი იმისათვის, რომ გავხდეთ ევროკავშირის წევრი".

კორძაიას თქმით, მნიშვნელოვანია, რომ რუსული კანონის არცერთი ნაწილი არ დარჩეს გასაჩივრების გარეშე, რადგან "კანონი საქართველოში არავის არ უტოვებს თავისუფალ სივრცეს".

სალომე ზურაბიშვილი, რუსულ კანონს, საკონსტიტუციო სასამართლოში 78-ე მუხლთან მიმართებით გაასაჩივრებს.

რუსული კანონის გასაჩივრებას გეგმავენ არასამთავრობო ორგანიზაციებიც. ამის შესახებ მათ 30 მაისს განაცხადეს. მათი თქმით, პარალელურად, ემზადებიან ადამიანის უფლებათა ევროპულ სასამართლოში საჩივრის წარსადგენად, რომელსაც შესაბამის დროს მიმართავენ.

მსგავსი: არასამთავრობოები გეგმავენ, მიმართონ სარჩელით საკონსტიტუციო სასამართლოს, საჩივარს ამზადებენ სტრასბურგისთვისაც

ასევე, ნახეთ: "იმედია, სტრასბურგის სასამართლო პოლიტიკური გავლენის ქვეშ არ მოექცევა" — კობახიძე რუსული კანონის შესახებ არასამთავრობოების სარჩელზე