2024 წელი მთელს მსოფლიოში ყველაზე დიდი არჩევნების წელია. 80-ზე მეტი ქვეყნის ოთხ მილიარდამდე მოქალაქე საარჩევნო ყუთებთან გადაწყვეტილების მისაღებად მივა. ასეთ დროს, საზღვარგარეთ მცხოვრები დიასპორების როლი და გავლენა განსაკუთრებით აქტუალური ხდება.

საქართველოს 2024 წლის ოქტომბრის არჩევნების შედეგებზე დღითი დღე უფრო მეტი ხდება დამოკიდებული. ქვეყანაში მიმდინარე მოვლენების გათვალისწინებით, საპარლამენტო არჩევნები ერთგვარ რეფერენდუმადაც კი შეგვიძლია აღვიქვათ. არჩევნების შედეგები არა მხოლოდ 4 წლის ვადით პარლამენტის შემადგენლობას განსაზღვრავს, არამედ მომავალი ათწლეულების განმავლობაში, ჩვენი ქვეყნის მიერ გაკეთებულ პოლიტიკურ არჩევანს განამტკიცებს. გზაგასაყარზე მდგომი სახელმწიფოსთვის, არჩევნებში თითოეული მოქალაქის მონაწილეობა განსაკუთრებით მნიშვნელოვანია.

დიასპორის ჯგუფებს შეუძლიათ გავლენა მოახდინონ სამშობლოში მიმდინარე პოლიტიკურ პროცესებზე, მათ შორის, საგარეო პოლიტიკაზე, საერთაშორისო ურთიერთობებზე, პოლიტიკურ დღის წესრიგზე. ამ გავლენის ერთ-ერთი ყველაზე თვალსაჩინო გამოხატულება კი არჩევნებში მონაწილეობა და ხმის მიცემაა.

იმის ფონზე, რომ საქართველოდან მიგრაციის მაჩვენებელი რეკორდულად იზრდება, საინტერესოა, თუ როგორი იყო დიასპორის არჩევნებში ჩართულობა წლების განმავლობაში და როგორ შეუძლიათ საზღვარგარეთ მცხოვრებ საქართველოს მოქალაქეებს 2024 წლის საპარლამენტო არჩევნებში საკუთარი ხმის დაფიქსირება.

ფორსეტის მიერ მომზადებული ინფოგრაფიკა სწორედ ამ საკითხებს შეეხება: