სომხეთის პოლიციის ყოფილი უფროსი ვლადიმირ გასპარიანი და პოლიციის სამი ყოფილი თანამშრომელი სომხეთის ანტიკორუფციულმა სასამართლომ დამნაშავედ ცნო უფლებამოსილების ბოროტად გამოყენებასა და გაფლანგვაში, თუმცა ოთხივე მათგანი ამნისტიით გაათავისუფლეს.

გასპარიანი, მისი მოადგილე ლევონ ერანოსიანი და პოლიციის კიდევ ორი ყოფილი თანამშრომელი სასამართლომ დამნაშავედ სამშაბათს ცნო.

ვლადიმირ გასპარიანი ორ საქმეში გაამტყუნეს, თუმცა ერთი ბრალისგან ხანდაზმულობის ვადის გასვლის გამო გათავისუფლდა, მეორე ბრალი კი 2019 წელს გამოცხადებული ამნისტიის საფუძველზე მოხსნა.

ამავე მიზეზით გათავისუფლდა კიდევ სამი ყოფილი პოლიციელი.

როგორ პროკურატურამ, ასევე — გასპარიანის ადვოკატმა პირობა დადო, რომ გაასაჩივრებენ ანტიკორუფციული სასამართლოს გადაწყვეტილებას. პროკურატურამ განაცხადა, რომ გაასაჩივრებს გადაწყვეტილებას დამნაშავეთა გათავისუფლების შესახებ, ხოლო ალექსანდრე კოჩუბაევმა, გასპარიანის ადვოკატმა, გამამტყუნებელი განაჩენი დაუშვებლად მიიჩნია.

"ეს აუცილებლად გასაჩივრდება, რადგან გამამართლებელი განაჩენის გარდა, ნებისმიერი გადაწყვეტილება უკანონოა“, — განაცხადა კოჩუბაევმა.

ერთ-ერთ ბრალდებაში ნათქვამია, რომ 1997-2011 წლებში, სამხედრო პოლიციის დეპარტამენტის უფროსად მსახურობისას, გასპარიანმა არ მიიღო ზომები იმ ფაქტის გამო, რომ სამი ჯარისკაცი კვლავ იღებდა ხელფასს მაშინ, როცა საკუთარ მოვალეობას არ ასრულებდა.

2022 წელს სპეციალურმა საგამოძიებო სამსახურმა დაადგინა, რომ ეს ჯარისკაცები მესამე პრეზიდენტის, სერჟ სარგსიანის ძმების მძღოლად და დაცვის წევრებად მუშაობდნენ.

გასპარიანმა, ასევე, 2011-2018 წლებში, როდესაც პოლიციის უფროსის თანამდებობაზე მუშაობდა, პოლიციის ბიუჯეტიდან უკანონოდ გამოყო 35 მილიონი დრამის (91,000 აშშ დოლარი) ღირებულების ქონება იმ თანამშრომლებისთვის, რომლებსაც არ სჭირდებოდათ საცხოვრებელი პირობების გაუმჯობესება.

სპეციალურმა საგამოძიებო სამსახურმა აღმოაჩინა, რომ ერთ-ერთი ქონება გადაეცა პირს, რომელიც მხოლოდ ექვსი დღით იყო დასაქმებული პოლიციის კულტურის ცენტრში, ის გასპარიანის ქალიშვილს მუსიკალური პროდიუსერის მომსახურებას უწევდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.