საერთაშორისო გამჭვირვალობა — საქართველოს (TI) ინფორმაციით, ქუთაისის სააპელაციო სასამართლოს მოსამართლე, შოთა სირაძე, დეკლარაციაში უძრავ ქონებას და ხელფასს მალავს.

სირაძე, რომელიც საქართველოს შინაგან საქმეთა სამინისტროს საპატრულო პოლიციის დეპარტამენტის დირექტორის, ვაჟა სირაძის მამაა, 2024 წლის დეკლარაციაში არ უთითებს მისი და მისი მეუღლის სახელზე რეგისტრირებულ უძრავ ქონებას.

TI-ის მიხედვით, შოთა სირაძემ დეკლარაციაში არ ასახა შემდეგი უძრავი ქონება:

  • 873 კვ.მ. მიწის ნაკვეთი მასზე არსებული შენობა-ნაგებობებით ქალაქ ხობში.
  • 500 კვ.მ. მიწის ნაკვეთი მასზე არსებული შენობა-ნაგებობით ხობის მუნიციპალიტეტის სოფელ ყულევში.
  • 5498 კვ.მ. მიწის ნაკვეთი ხობის მუნიციპალიტეტის სოფელ გურიფულში.
  • 2785 კვ.მ. მიწის ნაკვეთი ხობის მუნიციპალიტეტის სოფელ გურიფულში.

ასევე, სირაძემ დეკლარაციაში არ ასახა ცოლის, ეკა ლატარიას, შემდეგი უძრავი ქონება:

  • 1000 კვ.მ მიწის ნაკვეთი ხობის მუნიციპალიტეტის სოფელ ყულევში.
  • ორი მცირე ფართი (9.88 კვ.მ. და 13.43 კვ.მ.) ქალაქ ხობში.

გარდა ამისა, შოთა სირაძემ დეკლარაციაში ასევე არ ასახა დედის, მზია სირაძის საკუთრებაში არსებული შემდეგი ქონება:

  • 3150 კვ.მ. მიწის ნაკვეთი ხობის მუნიციპალიტეტის სოფელ გურიფულში.

საერთაშორისო გამჭვირვალობა — საქართველო წერს, რომ შოთა სირაძემ არც 2023 წლის და არც 2024 წლის ქონებრივ დეკლარაციაში არ ასახა მოსამართლის მანდატით მიღებული წლიური შემოსავალი.

ასევე, სირაძის ცოლი, ეკა ლატარია შპს კატე გლობალის 100%-იან წილს ფლობს და ამავდროულად კომპანიის დირექტორია, რაც დეკლარაციაში არასრულად, მეწილეობის გამოტოვებით არის მითითებული.

"ამასთან, ლატარია შპს გლობალ ოილის მეწილე და სპს ბერაია და კომპანია სპს-ის თანადამაარსებელი და დირექტორია. შპს გლობალ ოილის დირექტორმა გელა ხუნწარიამ ქართულ ოცნებას 2020-2021 წლებში 30 000 და 15 000 ლარი შესწირა", — წერს TI.

საერთაშორისო გამჭვირვალობა — საქართველო წერს, რომ საქართველოს კორუფციის წინააღმდეგ ბრძოლის შესახებ კანონის თანახმად, შოთა სირაძე, როგორც ქუთაისის სააპელაციო სასამართლოს მოსამართლე, ვალდებულია ეს ინფორმაცია სრულად ასახოს მისი ქონებრივი მდგომარეობის დეკლარაციაში.

TI მიმართავს ანტიკორუფციულ ბიუროს შეისწავლოს შოთა სირაძის დეკლარაციაში გამოვლენილი დარღვევა და მოახდინოს შესაბამისი რეაგირება.