"სიტყვის თავისუფლება, გამოხატვის თავისუფლება, მედიის დამოუკიდებლობა - ეს ნიშნავს თავისუფლებას და დამოუკიდებლობას სახელმწიფოსგან და არა რომელიმე სხვა სუბიექტისგან ან საკუთარი, პირადი სიმპათიებისა და განცდებისგან" - ეს განცხადება თავისუფალი დემოკრატების წევრმა, შალვა შავგულიძემ რუსთავი 2-ის საქმესთან დაკავშირებით დღეს მიღებულ გადაწყვეტილებაზე გააკეთა.

შავგულიძის განმარტებით, ვინაიდან სახელმწიფომ ამ საქმეზე რუსთავი 2 არ უზრუნველყო სამართლიანი სასამართლოს უფლებით, ქართულმა ოცნებამ, რომელიც დღეს სახელმწიფოს წარმოადგენს, ხელყო სიტყვის თავისუფლება და მედიის დამოუკიდებლობა:

"ასეთ შემთხვევებში, როდესაც სახელმწიფო, სასამართლოს ხელით, ხელყოფს ამ ღირებულებებს, უკვე დემოკრატიაზე ამბიციის მქონე საზოგადოების ვალია დემოკრატიისთვის ესოდენ ფუნდამენტური და უძვირფასესი ღირებულება დაიცვას".

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.