დაღესტანში პოლიციის პუნქტებზე, ეკლესიებსა და სინაგოგაზე თავდასხმებს 15-ზე მეტი პოლიციელი და რამდენიმე მშვიდობიანი მოქალაქე ემსხვერპლა.

მოკლულია 6 შეიარაღებული პირიც.

კოორდინირებული თავდასხმები გუშინ, 23 ივნისს, დერბენტსა და მაჰაჩყალაში მოხდა.

რესპუბლიკის მეთაურმა, სერგეი მელიკოვმა განაცხადა, რომ "გასაგებია, თუ ვინ დგას თავდასხმების ორგანიზების უკან", თუმცა დეტალებზე არ უსაუბრია.

გუშინდელი თავდასხმების სამიზნე იყო ორი ეკლესია და სინაგოგა, ასევე, პოლიციის განყოფილება მაჰაჩყალაში. დაღუპულთა შორის არის მართლმადიდებელი ეკლესიის მღვდელი.

დერბენტში, სადაც უძველესი ებრაული თემი ცხოვრობს, შეიარაღებული პირები თავს დაესხნენ სინაგოგას და ეკლესიას, რომლებიც შემდეგ გადაწვეს.

პოლიციის მანქანას დაესხნენ თავს სოფელ სერგოკალშიც. სამართალდამცველებმა დააკავეს სერგოკალინსკის დასახლების ადგილობრივი მმართველი მაგომედ ომაროვი, მას შემდეგ, რაც გავრცელდა ცნობა, რომ თავდამსხმელებს შორის ომაროვის ორი შვილიც იყო.

რუსული საინფორმაციო სააგენტოების ინფორმაციით, კონტრტერორისტული ოპერაცია დაღესტანში უკვე დასრულებულია.

რესპუბლიკაში დღეიდან სამდღიანი გლოვაა გამოცხადებული.