პაატა ბურჭულაძის მრჩეველი სამართლებრივ საკითხებში, დავით ჯანდიერი აცხადებს, რომ სასამართლო, რომელმაც რუსთავი 2-ის საქმეზე დღეს მოსამართლე თამაზ ურთმელიძის გადაწყვეტილება დატოვა ძალაში, არის ხელისუფლების მიერ მართული:

"მართული სასამართლო, სამწუხაროდ, დღევანდელი ხელისუფლების ყველაზე მთავარი მოკავშირეა, ხელისუფლების, რომელიც კომფორტულად გრძნობს მხოლოდ ასეთ პირობებში თავს, რომლის მთავარი მზიანი არის სიტყვის და გამოხატვის თავისუფლების შეზღუდვა. იმ პროცესებს, რომლებსაც სააპელაციო სასამართლოში ვაკვირდებოდით, რა თქმა უნდა, არანაირი კავშირი არ ჰქონდა სამართალთან და სამართლიანობასთან".

ჯანდიერის განცხადებით, იმ პირობებში, როდესაც რუსთავი 2-ის წარმომადგენლები სასამართლო დარბაზიდან გააძევეს, როდესაც არხის გენერალურ დირექტორს არხის ინტერესების დაცვის საშუალება არ ჰქონდა, როდესაც შუამდგომლობის დაყენების შესაძლებლობაც არ ჰქონდა მხარეს, როდესაც პროცესის დარჩენილ მონაწილეებს მკაცრად ჰქონდათ ვადა განსაზღვრული საკუთარი პოზიციის ჩამოსაყალიბებლად, კოლეგიის მრავალჯერადი ცვლილება და ხელისუფლების წარმომადგენლების განცხადებები ადასტურებდა იმას, რომ რუსთავი 2 უნდა დამარცხებულიყო.

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.