რა ხდება: ლელოს ერთ-ერთი ლიდერი ირაკლი კუპრაძე ეხმიანება სახელმწიფოს გადაწყვეტილებას, ანაკლიის პორტის ინვესტორის კონკურსში გამარჯვებულად ჩინური კონსორციუმი გამოაცხადოს.

  • კუპრაძე გადაწყვეტილებას ჩინეთის ეკონომიკურ ინტერესებს ამოფარებულ რუსულ პოლიტიკად აფასებს.

დეტალები: კუპრაძის ინფორმაციით, ინვესტორთა კონკურსში გამარჯვებული ჩინური კონსორციუმი (CCCC) არის მულტინაციონალური საინჟინრო და სამშენებლო კომპანია, რომლის 63.8%-იან წილს ფლობს ჩინეთის სახალხო რესპუბლიკა, ასევე, აქციონერები არიან Merrill Lynch, BlackRock და JPMorgan Chase.

მისივე ინფორმაციით, კონსორციუმს განვითარებად ქვეყნებში უხარისხო მშენებლობის, შრომითი ექსპლუატაციის, გარემოს დაბინძურების, კორუფციის, მოსყიდვის და ვალის მდგრადობის დარღვევის დიდი გამოცდილება აქვთ.

კონკრეტულად, კუპრაძის განცხადებით:

  • 2009 წელს ფილიპინებში საგზაო პროექტის სატენდერო პროცესში თაღლითობის აღმოჩენის გამო მსოფლიო ბანკმა CCCC-ს გზებისა და ხიდების პროექტებში მონაწილეობა რვა წლით აუკრძალა.
  • ეკვადორში, CCCC-ის შვილობილმა კომპანიამ 2014 წელს გააფორმა კონტრაქტი მოწინავე ტექნოლოგიების განათლების ცენტრის აშენებაზე, თუმცა ობიექტების 80 პროცენტზე მეტი გამოუსადეგარი დარჩა, სტრუქტურული ხარვეზების გამო.
  • 2018 წელს ბანგლადეშმა CCCC-ის შვილობილი კომპანია შავ სიაში შეიყვანა საჯარო მოხელეების მოსყიდვის მცდელობისთვის.
  • 2018 წელს მალაიზიის მთავრობამ შეაჩერა CCCC სარკინიგზო პროექტი კორუფციისა და overbilling-ის (ზედმეტის გადახდევინების პრაქტიკა) გამო.
  • 2018 წელს CCCC-ს შვილობილი კომპანია კენიაში ამხილეს, რომ ადგილობრივ მუშახელს ჩინელი მუშახელის ანაზღაურების მესამედს უხდიდნენ.
  • 2020 წელს აშშ-ის თავდაცვის დეპარტამენტმა გამოაქვეყნა "კომუნისტური ჩინური სამხედრო კომპანიების“ სახელები, რომელთა სიაში CCCC იყო.

"და ისევ, ეს არის ჩინეთის ეკონომიკურ ინტერესებს ამოფარებული რუსული პოლიტიკა. ამ ხელისუფლებამ რუსეთის ორბიტაზე გაიყვანა ეს ქვეყანა და საერთაშორისო კორუფციულ აბლაბუდაში ცდილობს მის გახვევას. ოფშორების კანონით დაწყებული საერთაშორისო მაქინაციებში ეჭვმიტანილი კომპანიებით დამთავრებული. ღრმა კომუნიზმში ვბრუნდებით! მთავრობის სასახლეზე წითელი ვარსკვლავის აღმართვაღა დარჩათ!", — წერს კუპრაძე და იმედს გამოთქვამს რომ "რუსულ რეჟიმს ოქტომბერში, საპარლამენტო არჩევნების შემდეგ, მოსკოვში გავისტუმრებთ".

ბოლო ხაზი: ეკონომიკის სამინისტროს ინფორმაციით, ანაკლიის ღრმაწყლოვანი ნავსადგურის პროექტის კერძო პარტნიორის შერჩევის პროცესი დასრულებულია.

  • ანაკლიის ღრმაწყლოვანი ნავსადგურის განვითარების სააგენტოში საბოლოო წინადადება ჩინურმა კონსორციუმმა China Communications Construction Company Limited (China) & China Harbour Investment Pte. Ltd (Singapore) წარადგინა.