რა ხდება: აქციებში მონაწილე ორი დაკავებული, რომელთა მიმართ არასათანადო მოპყრობის შესახებ ინფორმაცია დღეს გავრცელდა, სახალხო დამცველის წარმომადგენლებმა მოინახულეს.

დეტალები: მათი ინფორმაციით, ერთ-ერთმა დაკავებულმა თქვა, რომ შესახლებული იყო საკანში, სადაც მის გარდა იმყოფებოდა 4 პატიმარი, სხვაგვარი პოლიტიკური შეხედულებით, რის გამოც ხშირად კამათობდნენ.

  • ომბუდსმენის აპარატი ირწმუნება, რომ სიტყვიერ, ან ფიზიკურ დაპირისპირებას ადგილი არ ჰქონია.
  • დაკავებული გუშინ, 28 მაისს, მისივე თხოვნის საფუძველზე სხვა საკანში გადაიყვანეს, სადაც "თავს გრძნობს კარგად და უსაფრთხოდ".

რაც შეეხება მეორე დაკავებულს, მან სახალხო დამცველის წარმომადგენლებს უთხრა, რომ პენიტენციურ დაწესებულებაში მოთავსების შემდეგ გარკვეული პრობლემები და შეკამათება ჰქონდა, "თუმცა საკითხი ამ დროისთვის მოგვარებულია".

  • ასევე, მისი თქმით, აღელვების ნიადაგზე სცადა საპარსის გადაყლაპვა, რაც შემდეგ გადაიფიქრა.
  • განმარტა, რომ ჰქონდა კონსულტაცია ფსიქოლოგთანაც და დადებითად შეაფასა კონსულტაცია. ამის გამო კვლავ სურს განმეორებითი კონსულტაცია, რაზეც სახალხო დამცველის აპარატი მიმართავს სპეციალურ პენიტენციურ სამსახურს.