რა ხდება: რადიო თავისუფლების ინფორმაციით, ანონიმურმა წყარომ მათი ვაშინგტონის ბიუროს ჟურნალისტს უთხრა, რომ შეერთებული შტატები ფლობს ინფორმაციას, რომელსაც "ქართული პოლიტიკური ელიტის წარმომადგენლების რეპუტაციის გაცამტვერება შეუძლია".

დეტალები: გამოცემა წერს, რომ ჯო უილსონის კანონპროექტზე, რომელსაც MEGOBARI Act ეწოდება, მუშაობა უკვე რამდენიმე თვეა მიმდინარეობს. ამისი მიზეზი კი იყო კონგრესში ექსპერტების მოლოდინი, რომ ქართული ოცნება რუსულ კანონპროექტს, რომელიც შარშან გაიწვია, ხელახლა წარადგენდა.

• კანონპროექტი აშშ-ის პრეზიდენტის ადმინისტრაციას ავალდებულებს საქართველოში რუსეთისა და ჩინეთის გავლენის შესწავლას, მაშ შორის, უსაფრთხოების სფეროში.

კანონპროექტში ჩახედული წყაროს ცნობით, ამ საკითხზე გადაწყვეტილება — მათ შორის, სანქციებსა და რუსეთისა და ჩინეთის მავნე გავლენის საკითხებზე, შესაძლოა მალე გამოცხადდეს, MEGOBARI Act-ის მიღების შემთხვევაში.

• "ქართულ პოლიტიკურ ელიტაში, რუსი აგენტების გამოაშკარავება ისევე როგორც ჩინეთის გავლენის შემთხვევების გამოვლენა, საფუძველს გამოაცლის ქართული ოცნების ნარატივს, რომლის თანახმად, ის ქვეყნის სუვერენიტეტს იცავს უცხოური აგენტების კანონპროექტით".

რას შეეხება შესაძლო სანქციებს, რადიო თავისუფლება წერს, რომ აშშ-ის სანქციები ცალკეულ ადამიანებსა და მათ მიერ კონტროლირებად კომპანიებს უკრძალავს, აშშ-ს მოქალაქეებთან საქმის დაჭერას და რაც კიდევ უფრო მნიშვნელოვანია, ის უკრძალავს ამ ადამიანებსა და მათ კომპანიებს აწარმოონ ფინანსური ოპერაციები ამერიკულ დოლარში — ყველაზე ფართო სარგებლობის ვალუტით.

წყაროს თქმით, სანქციები მტკივნეული შეიძლება აღმოჩნდეს, ვინაიდან საქართველოს ეკონომიკაში დოლარიზაციის მაღალი მაჩვენებელია და საბანკო კრედიტები და დეპოზიტები დოლარშია გაცემული.

რა ვიცით MEGOBARI Act-ზე: გამოცემა Politico-მ გაავრცელა ინფორმაცია, რომ კონგრესმენი ჯო უილსონი აპირებს კონგრესში დააინიციიროს კანონპროექტი, რომელიც ითვალისწინებს სანქციებს რუსული კანონის მიღების შემთხვევაში, იმ პირების წინააღმდეგ, ვინც კანონის შემუშავებასა და დამტკიცებაზე არიან პასუხისმგებლები.

• ასევე, საუბარია საქართველოში რუსეთისა და ჩინეთის აგენტების გამოვლენის შესახებ.
• გარდა ამისა, თუ საქართველოს ანტიდემოკრატიული კურსი შეიცვლება, აშშ ჩვენს ქვეყანას ჰპირდება ვიზალიბერალიზაციას, ეკონომიკურ და სამხედრო დახმარებას, თავდაცვის კუთხით.

კანონპროექტის ინგლისური დასახელების აბრევიატურა ქართულ სიტყვა მეგობარს ემთხვევა, რაც, სიმბოლურად, საქართველოსადმი დამოკიდებულებას გამოხატავს.

• MEGOBARI იშიფრება როგორც Mobilizing and Enhancing Georgia’s Options for Building Accountability, Resilience, and Independence Act (საქართველოს ანგარიშვალდებულების, გამძლეობისა და დამოუკიდებლობის შესაძლებლობების გაძლიერებისა და მობილიზაციის აქტი).
• მსგავსი შინაარსის აქტის შეტანას ელიან კონგრესის ზედა პალატაში, სენატშიც.