მოკლედ: ილიას სახელმწიფო უნივერსიტეტის პროფესორ-მასწავლებლები ქვეყანაში რუსული კანონის წინააღმდეგ უწყვეტ საპროტესტო აქციებს ეხმაურებიან და განცხადებას ავრცელებენ.

დეტალები: "ჩვენ, ილიაუნის პროფესორ-მასწავლებლები ყურადღებით ვაკვირდებით ქვეყანაში მიმდინარე პროცესებს და მიუხედავად იმისა, რომ ფიზიკურად აქციებზე ვართ ახალგაზრდების გვერდით, გვსურს ოფიციალურად დავაფიქსიროთ ჩვენი პოზიცია. ჩვენ გვჯერა, ილიას სახელმწიფო უნივერსიტეტი ყოველთვის დგას ისტორიის სწორ მხარეს.

  • რუსული კანონის მიღებით ზიანდება ჩვენი და ჩვენი სტუდენტების მომავალი და ის ღირებულებები, რასაც ჩვენ მათ ვასწავლით — აზრს კარგავს. მაშინ, როდესაც ჩვენ და ჩვენს სტუდენტებს ქუჩაში უმოწყალოდ გვცემენ — საჭიროა გაერთიანება და ერთიანი ძალებით წინააღმდეგობის გაწევა.
  • შესაბამისად, სრული პასუხისმგებლობით ვაცხადებთ, რომ თუკი ილიაუნის სტუდენტები გადაწყვეტენ შეაჩერონ სასწავლო პროცესი და გამოაცხადონ დაუმორჩილებლობა, ჩვენ ვუერთდებით მათ!
  • არა რუსულ კანონს! არა ძალადობას! ერთად ევროპისკენ და ევროპული მომავლისკენ!
  • მეგობრებო, ჩვენ თქვენს გვერდით ვდგავართ ამ რთულ ბრძოლაში!" — ვკითხულობთ განცხადებაში.

კონტექსტი: ქვეყანაში რუსული კანონის საწინააღმდეგო აქციები გრძელდება. დღეს, 11 მაისს, თბილისის სახელმწიფო უნივერსიტეტის სტუდენტების ნაწილმა უარი განაცხადა ლექციებზე დასწრებაზე მანამ, ვიდრე საქართველოს ხელისუფლება რუსულ კანონს უკან არ გაიწვევს.

  • "მივიღეთ გადაწყვეტილება, რომ ორშაბათიდან უარი ვთქვათ აუდიტორიებში შესვლაზე. დილის 9 საათიდან ვიდგებით რუსთაველის გამზირზე", — განაცხადეს სტუდენტებმა.

თსუ-ს სტუდენტებს სოლიდარობა კავკასიის უნივერსიტეტის სტუდენტებმაც გამოუცხადეს:

  • "კავკასიის უნივერსიტეტის სტუდენტები მხარდაჭერას ვუცხადებთ თსუ-ს სტუდენტებს, რადგან ჩვენი გამაერთიანებელი სწორედ ის ევროპული ღირებულებები და მომავალია, რომლის დაკარგვის პირასაც ვიმყოფებით ახლა", — წერენ სტუდენტები.