სოციალურ ქსელში ჩვენი ანგარიშები საკმაოდ დიდ პირად ინფორმაციას იტევს, აქტივობა იქნება ეს, კავშირები თუ მიმოწერები. თუ ეჭვი გაქვთ, რომ თქვენს ანგარიშზე ვინმე სხვასაც შეიძლება ჰქონდეს წვდომა, ამის შემოწმება მარტივად არის შესაძლებელი.

Facebook-ის მენიუდან ჯერ ველში პარამეტრები და უსაფრთხოება (Settings & Privacy) უნდა შეხვიდეთ და პარამეტრებს (Settings) დააჭიროთ. Meta-ს ანგარიშების ცენტრიდან (Accounts Centre) შემდეგ პაროლი და უსაფრთხოება (Password & security) აირჩიოთ. შემდეგ უკვე შეგეძლებათ, სად ხართ ავტორიზებული (Where you're logged in) ველიდან იხილოთ, რა მოწყობილობებია შესული თქვენს Facebook ანგარიშზე.

თუკი უცხო მობილურს/კომპიუტერს აღმოაჩენთ, გამოსასვლელად მოწყობილობის არჩევა (Select devices to log out) ველიდან შესაბამისი მოწყობილობა აირჩიეთ და ღილაკზე გამოსვლა (Log out) დაჭერით სისტემიდან გამოდით.

ამის შემდეგ უმჯობესია, პაროლი განაახლოთ და შეამოწმოთ, უცხო აქტივობა ხომ არ განხორციელებულა თქვენი სახელით. ეს უსაფრთხოების საბაზისო ინსტრუქციაა, რომელსაც მსგავს სიტუაციებში უნდა მიმართოთ.

როგორ დავიცვათ Facebook ანგარიში

იმისათვის, რომ ანგარიშზე შეღწევისგან დაიცვათ თავი, მნიშვნელოვანია, რომ ორეტაპიანი ავტენთიფიკაცია გეყენოთ. ასე შეტყობინება მოგივათ ყოველ ჯერზე, როცა ვინმე უცნობი ბრაუზერიდან ან მობილურიდან ეცდება თქვენს ანგარიშზე შესვლას. სისტემაში შესასვლელად საჭირო იქნება სპეციალური უსაფრთხოების კოდის შეყვანა ან შესვლის დადასტურება. დეტალურ ინსტრუქციას Facebook-ის დახმარების ცენტრიდან იხილავთ, ამ ბმულზე.

იმისათვის, რომ უცხო პირებმა თქვენს ანგარიშზე მარტივად ვერ შეაღწიონ:

• გამოიყენეთ რთული პაროლები;
• არ დააყენოთ ერთი და იგივე პაროლი სხვადასხვა პლატფორმაზე;
• Facebook-ზე საკონტაქტო ინფორმაციად მითითებული გქონდეთ თქვენი აქტიური მობილურის ნომერი და მეილი, რომ შეტყობინებები არ გამოგრჩეთ;
• არ ისარგებლოთ საჯარო/დაუცველი Wi-Fi ქსელებით;
• არ გადახვიდეთ საეჭვო ბმულებზე;
• აპლიკაციების გადმოწერამდე შეამოწმეთ, რამდენად უსაფრთხოა ისინი.

თუ კიბერუსაფრთხოებასთან დაკავშირებული საკითხები გაინტერესებთ და ციფრულ სამყაროში თავის უკეთ დაცვა გსურთ, აქ ჩვენს სხვა სტატიებსაც გაეცნობით.