არამარტო ამერიკელებისთვის აღმოჩნდა შოკისმომგვრელი, 25 ივლისს, სენატში, 80 წლის არიზონელი სენატორის, ჯონ მაკკეინის გამოჩენა საჯაროდ. მას სულ რაღაც რამდენიმე დღის წინ დაუსვეს ტვინის კიბოს უმძიმესი ფორმის დიაგნოზი და სასწრაფო ოპერაციაც მალევე გაუკეთეს. ჯონ მაკკეინს ექიმებმა ამოაჭრეს თავის არეში არსებული სიმსივნური წარმონაქმნები. სენატში სიტყვით გამოსვლისას, რომელიც ცოტა ხნის წინ გაიმართა, მაკკეინს ჯერ კიდევ ეტყობოდა ნაოპერაციევი და შეშუპება ჭრილობის გარშემო.

ჯანდაცვის შესახებ კანონპროექტის კენჭისყრა პრეზიდენტ ტრამპისა და რესპუბლიკური პარტიისთვის სასიცოცხლოდ მნიშვნელოვანია, რადგან ამით უნდა აღსრულდეს ტრამპის ერთ-ერთი მთავარი წინასაარჩევნო დაპირება ბარაკ ობამას ჯანდაცვის პროგრამის გაუქმების შესახებ.

რესპუბლიკელებისთვის თითოეული სენატორის ხმა გადამწყვეტია. როგორც ჩანს, 80 წლის სენატორისთვის ტვინის სიმსივნე და რამდენიმე დღის წინ თავზე გაკეთებული ოპერაცია არ აღმოჩნდა წინაღობა, მონაწილეობა მიიღოს უმნიშვნელოვანესი კანონპროექტის განხილვაში.

სენატში სიტყვით გამოსვლისას მაკკეინმა თქვა, რომ ხმის მიცემის შემდეგ ის თავის სახლში, არიზონაში წავა დაავადებასთან საბრძოლველად.

მაკკეინისთვის დასმული გლიობლასტომას დიაგნოზი, ერთ-ერთ ყველაზე მძიმე ფორმის სიმსივნეს განეკუთვნება. პაციენტთა მხოლოდ ათი პროცენტი, მკურნალობის შემთხვევაში, ხუთ წლამდე ცოცხლობს. 90 პროცენტის შემთხვევაში კი, დარჩენილი სიცოცხლის სავარაუდო ხანგრძლივობა, მკურნალობის მიუხედავად, 14 თვემდეა.

ჯონ მაკკეინი ვიეტნამის ომის ვეტერანია, რომელიც რამდენიმე წელი ტყვედ იყო ჩავარდნილი. ის არიზონას სენატორია 1987 წლიდან. მაკკეინი 2008 წელს რესპუბლიკელთა სახელით პრეზიდენტობისთვისაც კი იბრძოდა, თუმცა ბარაკ ობამასთან დამარცხდა. სენატორი მაკკეინი გამოირჩევა რუსეთის მიმართ ხისტი მიდგომებით და მიიჩნევს, რომ მასთან ურთიერთობების მეგობრულ დონეზე დალაგება შეუძლებელია. ამის გამო მან პრეზიდენტი ტრამპიც არაერთხელ გააფრთხილა. მაკკეინი არაერთხელ იმყოფებოდა საქართველოში და აშშ-ს საკანონმდებლო ორგანოში მუდმივად ლობირებს საქართველოს ინტერესებს.