მოკლედ: ევროპარლამენტარი პეტრას აუსტრევიჩუსი ევროკავშირისგან მოითხოვს, სანქციები დაუწესდეს თბილისში, მშვიდობიანი აქციის დაშლის ორგანიზატორებს.

დეტალები: კონკრეტულად, ევროპარლამენტში, საქართველოში არსებულ ვითარებასთან დაკავშირებით გამართული დებატებისას, მან დაასახელა განსაკუთრებულ დავალებათა დეპარტამენტის დირექტორი ზვიად ხარაზიშვილი (მეტსახელი — ხარება) და საპატრულო პოლიციის დეპარტამენტის უფროსი, ვაჟა სირაძე.

  • "თბილად მივესალმები საქართველოს მოსახლეობას, რომელიც ოპოზიციაშია და წინააღმდეგობას უწევს ასეთ კანონს. მოვუწოდებ ევროკავშირის ინსტიტუტებს, მიზნობრივი სანქციები გამოიყენონ მათ მიმართ, ვინც აორგანიზებს მშვიდობიანი დემონსტრანტების დევნას, კონკრეტულად, ზვიად ხარაზიშვილისა და ვაჟა სირაძის მიმართ უნდა იყოს გამოყენებული სანქციები, რომლებიც მოქმედებენ ქართველი ხალხის ნების წინააღმდეგ", — თქვა მან.

მსგავსი: უშუალოდ ვაჟა სირაძის მითითებით რამდენიმე პოლიციელმა შემათრია, მირტყამდნენ გამეტებით, ერთი ნეკნი მაქვს მოტეხილი — ელისაშვილი

რას პასუხობს მმართველი პარტია: პარლამენტის თავმჯდომარემ, შალვა პაპუაშვილმა თქვა, რომ ეს იყო "თავდასხმა ქართულ პოლიციაზე".

  • "პოლიციაზე თავდასხმა გულისხმობს სახელმწიფოზე თავდასხმას და მე ვისურვებდი, რომ ლიეტუვის საელჩომ გააკეთოს განმარტება ამასთან დაკავშირებით, რასთან გვაქვს საქმე, რატომ ესხმის თავს ლიეტუველი პოლიტიკოსი ქართულ პოლიციას", — თქვა პაპუაშვილმა.

ბოლო ხაზი: მშვიდობიანი აქციის მიმდინარეობისას პოლიციამ 40 ადამიანი დააკავა.

  • 16 აპრილის ღამეს სპეცრაზმმა ძალის გამოყენებით დაარბია აქციის მონაწილეები.
  • სცემეს ჟურნალისტებსაც.

ამ თემაზე: "მირტყამდა რამდენიმე რობოკოპი" — სპეცრაზმმა მშვიდობიანი მომიტინგეები ძალის გამოყენებით დაარბია