რა ხდება: ევროკავშირის უმაღლესი წარმომადგენელი, ჯოზეფ ბორელი და სამეზობლო პოლიტიკისა და გაფართოების საკითხებში ევროკავშირის კომისარი, ოლივერ ვარჰეი უცხოური გავლენის გამჭვირვალობის შესახებ კანონის მიღებასთან დაკავშირებით განცხადებას ავრცელებენ.

დეტალები: განცხადებაში აღნიშნულია, რომ მიუხედავად მასობრივი პროტესტისა და ევროკავშირის მოწოდებისა, უარი ეთქვათ კანონპროექტის განხილვაზე, პარლამენტმა ის პირველი მოსმენით მაინც მიიღო.

  • "მოვლენათა ამგვარი განვითარება ძალზე შემაშფოთებელია და ამ კანონის საბოლოო მიღება უარყოფითად იმოქმედებს საქართველოს წინსვლაზე ევროკავშირისკენ მიმავალ გზაზე. ეს კანონი ევროკავშირის ძირითად ნორმებთან და ღირებულებებთან შეუთავსებელია", — წერია განცხადებაში.

ბორელი და ვარჰეი აღნიშნავენ, რომ საქართველოს ჰყავს აქტიური სამოქალაქო საზოგადოება, რომელიც ხელს უწყობს ქვეყნის წარმატებულ წინსვლას ევროკავშირის წევრობისკენ.

შემოთავაზებულმა კანონმდებლობამ კი, შესაძლოა, შეზღუდოს როგორც სამოქალაქო საზოგადოებისა და მედია ორგანიზაციების თავისუფალი მუშაობის შესაძლებლობა, ასევე გამოხატვის თავისუფლება და მოახდინოს საქართველოს მოქალაქეებისთვის სარგებლის მომტანი ორგანიზაციების უსამართლოდ სტიგმატიზება.

  • "ევროკავშირი მოუწოდებს საქართველოს, თავი შეიკავოს ისეთი კანონმდებლობის მიღებისგან, რომელმაც შესაძლოა საქართველოს ევროკავშირისკენ მიმავალი გზა დაათმობინოს — ის გზა, რომელსაც საქართველოს მოქალაქეების აბსოლუტური უმრავლესობა უჭერს მხარს", — ნათქვამია განცხადებაში.

ბოლო ხაზი: პარლამენტმა რუსული კანონი დღეს, 17 აპრილს პირველი მოსმენით მიიღო.