მოკლედ: რუსეთის უშიშროების საბჭოს თავმჯდომარის მოადგილე და ყოფილი პრეზიდენტი, დმიტრი მედვედევი, ქართული ოცნების კანონპროექტს იწონებს და ამბობს, რომ თბილისის საპროტესტო აქციების უკან დასავლეთი დგას.

  • ამის შესახებ მედვედევი ტელეგრამზე წერს.

დეტალები: "ვინც მსგავს ქმედებებს სპონტანურ პროტესტს უწოდებს, პირველმა ესროლოს ქვა საკუთარ ანარეკლს. ყველა ამ აქციის უკან არის გამოცდილი და ნაცნობი ჰოლივუდის ხელი", — წერს მედვედევი.

  • ის იხსენებს დასავლეთის მწვავე კრიტიკასაც, როდესაც ასეთი კანონი ყირგიზეთის ხელისუფლებამ მიიღო. ასევე, წერს სახელმწიფო დეპარტამენტის დადებით შეფასებაზე, როდესაც გასულ წელს, იგივე კანონი, ქართულმა ოცნებამ უკან გაიწვია.
  • "ერთი წლის წინ, სხვათა შორის, აშშ-ის სახელმწიფო დეპარტამენტმა, მისი ოფიციალური წარმომადგენლის, პრაისის მეშვეობით, განსაკუთრებული "კმაყოფილება" გამოხატა, როდესაც საქართველოს ხელისუფლებამ კანონის წინა პროექტი გაიწვია, იმის გამო, რომ (სიტყვასიტყვით) დოკუმენტი იყო "შეუთავსებელი ევროატლანტიკურ ღირებულებებთან“. კარგი, დიახ, მართალია. ღირებულებები განსხვავებულია. შავი ზღვა არ არის ატლანტიკური, ჯორჯია არ არის საქართველო, მიუხედავად სახელების მსგავსებისა",— აცხადებს მედვედევი.
  • ვრცელ პოსტში რუსეთის უშიშროების საბჭოს ხელმძღვანელის მოადგილე აკრიტიკებს ამერიკულ FARA-ს და ევროპულ კანონმდებლობებს, ამბობს, რომ რუსეთში მოქმედი კანონი, უცხო ქვეყნების აგენტების შესახებ, "სრულიად ლოიალურია".

ბოლო ხაზი: პარლამენტში რუსული კანონის პირველი მოსმენით განხილვა საპროტესტო აქციების ფონზე მიმდინარეობს.