რა ხდება: ოლექსანდრ სირსკი, უკრაინის შეიარაღებული ძალების მთავარსარდალი, ტელეგრამზე აცხადებს, რომ ბოლო დღეებში "მდგომარეობა საგრძნობლად გაუარესდა" აღმოსავლეთის ფრონტზე.

  • "ეს, უპირველეს ყოვლისა, განპირობებულია რუსეთის ფედერაციის საპრეზიდენტო არჩევნების შემდეგ, მტრის შემტევი მოქმედებების მნიშვნელოვანი გააქტიურებით", — დაწერა მან.

დეტალები: შეიარაღებული ძალების მთავარსარდალი იტყობინება, რომ

  • რუსეთი აქტიურად უტევს უკრაინის პოზიციებს ლიმანის რაიონისა და ბახმუტის მიმართულებით, როგორც საბრძოლო ჯგუფებით, ასევე, ჯავშანტექნიკით.
  • და ცდილობს, გაარღვიოს უკრაინის შეიარაღებული ძალების წინააღმდეგობა პოკროვის მიმართულებით ათობით ტანკითა და ქვეითი საბრძოლო მანქანების გამოყენებით.

"ამას ხელს უწყობს თბილი, მშრალი ამინდი", — აცხადებს ის. "მიუხედავად მნიშვნელოვანი დანაკარგებისა, მტერი, ახალი დანაყოფების საშუალებით აძლიერებს ძალისხმევას ჯავშანტექნიკაზე, რითაც, პერიოდულად, ტაქტიკურ წარმატებებს აღწევს".

ის აცხადებს, რომ სახმელეთო ჯარების სარდლობასთან ერთად განიხილა თავდაცვის გაძლიერების შესაძლებლობები.

ომის შვიდას ოთხმოცდამეერთე დღე: დღეს, 2024 წლის 14 აპრილს, რუსეთის მიერ უკრაინაში შეჭრიდან და სრულმასშტაბიანი ომის დაწყებიდან 781-ე დღეს, უკრაინის შეიარაღებული ძალების გენერალური შტაბის დილის ანგარიშის თანახმად,

  • დღე-ღამის განმავლობაში 76 სამხედრო შეტაკება მოხდა;
  • რუსეთის ჯარებმა განახორციელეს ერთი სარაკეტო დარტყმა და 109 საჰაერო დარტყმა;
  • ასევე, 115 თავდასხმა მრავალჯერადი სარაკეტო სისტემებიდან უკრაინის არმიის პოზიციებზე და დასახლებულ პუნქტებზე;
  • ჩერნიგოვის, სუმის, ხარკოვის, ლუგანსკის, დონეცკის, ზაპოროჟიეს, დნეპროპეტროვსკის, ხერსონის და ნიკოლაევის ოლქების 110-ზე მეტი დასახლება საარტილერიო ცეცხლის ქვეშ მოხვდა;
  • ბახმუტის მიმართულებით უკრაინის შეიარაღებულმა ძალებმა მოიგერია 36 თავდასხმა;
  • უკრაინელმა ჯარებმა მოიგერიეს ცხრა თავდასხმა ავდეევსკის მიმართულებით, 6 რაიონის დასახლებებებში;
  • რუსეთის შეიარაღებულმა ძალებმა 22-ჯერ სცადეს უკრაინული ძალების თავდაცვის გარღვევა ნოვოპავლოვის მიმართულებით დასახლებულ რაიონებში.
  • ბოლო 24 საათის განმავლობაში უკრაინულმა ავიაციამ 11 რაიონს დაარტყა, სადაც რუსული ჯარები, იარაღი და სამხედრო ტექნიკაა თავმოყრილი.