პარლამენტის დეპუტატი ქართული ოცნებიდან, ნინო წილოსანი ამბობს, რომ თბილისში ბოლო ერთი კვირის განმავლობაში გამართული "ქართველთა მარში" და ქალთა მარში გამოხატვის თავისუფლების შემადგენელი ნაწილია. სწორედ ამ მიზეზის გამო, მისი აზრით, ლოგიკურია, რომ ხელისუფლებას მძაფრი რეაქცია არ აქვს. ამის შესახებ წილოსანმა ტელეკომპანია იმედის ეთერში ისაუბრა.

ჟურნალისტის კითხვაზე - ხომ არ თანაუგრძნობს ხელისუფლება რომელიმე მარშს - დეპუტატმა ასე უპასუხა:

"ხელისუფლებას არ სჭირდება არანაირი მარშების გამოკვება, ჩვენ ჩვენი ხედვის ფარგლებში ვახორციელებთ კონკრეტულ პოლიტიკას და ეს პოლიტიკა ეფუძნება დემოკრატიულ ღირებულებებს, რომელიც სრულიად უარს ამბობს ქსენოფობიაზე და აგრესიაზე".

დეპუტატი "ქართველთა მარშის" მიერ ქალების მიმართ გამოთქმულ შეურაცხმყოფელ გამონათქვამებსაც შეეხო.

"ქართული მარშის ორგანიზატორების მხრიდან შეურაცხმყოფელი და მუქარის შემცველი განცხადებების გაკეთება ქალის მიმართ, რომელმაც დააფიქსირა განსხვავებული აზრი. ჩემში ბადებს ეჭვს, რომ ისინი შორს არიან ე.წ. ქართველურ-ვაჟკაცური და ტრადიციული დამოკიდებულებისგან", - ასე გამოეხმაურა წილოსანი "ქართული მარშის" ორგანიზატორებისა და მონაწილეების მხრიდან გაეროში საქართველოს ახალგაზრდობის ყოფილი წარმომადგენლის, თათია დოლიძის მიმართ სექსუალური ძალადობის შინაარსის კომენტარებს.

ხვალ, 23 ივლისს თბილისში კიდევ ერთი აქციაა - არა რუსულ ფაშიზმს საქართველოშია დაგეგმილი, რომელსაც ევროპული საქართველო გეგმავს. აქციის მიზანი "ქართველთა მარშისა" და მისი ორგანიზატორების მხრიდან გამოთქმული ფაშისტური და ქსენოფობიური გამონათქვამების გაპროტესტებაა. ამავე დღეს, იმავე ადგილზე აქცია კონტრ-აქციას გეგმავს "ქართველთა მარში". ხვალიდენლ აქციას გამოეხმაურა პირდაპირ ეთერში საუბრის დროს ნინო წილოსანი.

"მინდა ხვალიდნელი აქციის მონაწილეებს მივმართო რომ ძალიან ფრთხილები იყვნენ თავიანთ ქმედებებში, რადგან ამან შეიძლება გამოიწვიოს არადემოკრატიული ქმედებების პროვოცირებას და საზოგადოებაში აგრესიის გაღვივება", - აღნიშნა ნინო წილოსანმა.