მოკლედ: მედიის თავისუფლების სწრაფი რეაგირების (MFRR) პარტნიორი ორგანიზაციები კატეგორიულად გმობენ საქართველოს მმართველი პარტიის მცდელობებს, მიიღონ "რუსული სტილის" კანონი, რომელიც საფრთხეს შეუქმნის მედიის თავისუფლებას და სამოქალაქო სივრცეს ქვეყანაში.

  • ამის შესახებ მათ მიერ გავრცელებულ განცხადებაშია ნათქვამი.

სტრიქონებს შორის: მედიის თავისუფლების სწრაფი რეაგირება (MFRR) არის ევროპის მასშტაბით მოქმედი მექანიზმი, რომელიც თვალყურს ადევნებს, აკონტროლებს და რეაგირებს პრესისა და მედიის თავისუფლების დარღვევებზე ევროკავშირის წევრ და კანდიდატ ქვეყნებში. ეს პროექტი უზრუნველყოფს იურიდიულ მხარდაჭერას, საჯარო ადვოკატირებას და ინფორმაციას ჟურნალისტებისა და მედიის თანამშრომლების დასაცავად.

დეტალები: MFRR-ს პარტნიორი ორგანიზაციები მოუწოდებენ ქართულ ოცნებას, დაუყოვნებლივ გააუქმოს შემზღუდველი კანონმდებლობა.

მიიჩნევენ, რომ ეს კანონი ხელისუფლებას მისცემს მძლავრ ინსტრუმენტს, დამოუკიდებელი ხმების შეზღუდვისთვის.

"დამატებითი პასუხისმგებლობა და ბიუროკრატიული მოთხოვნები, რომლებიც თან ახლავს "უცხო ქვეყნის აგენტის" სტატუსს, არღვევს არასამთავრობო ორგანიზაციებისა და მედიის რეგულარულ საქმიანობას, ეწინააღმდეგება მათ სამოქალაქო და ჟურნალისტურ ფუნქციებს. ასეთი ზომები გარკვეული ორგანიზაციების დისკრიმინაციას ახდენს, მათი დაფინანსების წყაროებიდან გამომდინარე და ქმნის გაუმართლებელ შეზღუდვებს"— წერია განცხადებაში.

ამასთან, ორგანიზაციებისთვის შემაშფოთებელია, რომ რუსული სტილის კანონმდებლობა სულ უფრო ძლიერდება მეზობელ ქვეყნებში:

  • 2 აპრილს ყირგიზეთის პრეზიდენტმა ხელი მოაწერა კანონს "უცხო ქვეყნების წარმომადგენლების შესახებ", რომელიც ავალდებულებს არაკომერციულ ორგანიზაციებს, მათ შორის მედიასაშუალებებს, დარეგისტრირდნენ "უცხოეთის წარმომადგენლებად" და წარადგინონ რეგულარული ფინანსური ანგარიშები და აუდიტები.
  • მიმდინარე წლის თებერვალში "უცხო ქვეყნის აგენტების" კანონი იყო 43 სხვა კანონპროექტს შორის, რომლებიც შეთავაზებული იქნა კენჭისყრისთვის ოკუპირებული აფხაზეთის პარლამენტში, "რუსეთისა და აფხაზეთის კანონმდებლობის ჰარმონიზაციის" მცდელობის ფარგლებში.

"MFRR-ის პარტნიორები შიშობენ, რომ საქართველოს პარლამენტის მიერ შეთავაზებულმა კანონმდებლობამ შეიძლება სერიოზულად შეარყიოს დამოუკიდებელ ჟურნალისტიკას, ასევე გამოხატვის თავისუფლება ქვეყანაში. ჩვენ სრულ სოლიდარობას ვუცხადებთ საქართველოში დამოუკიდებელ ჟურნალისტებს და პრესის თავისუფლების დამცველებს და ვიმეორებთ ჩვენს მოწოდებას ხელისუფლებისადმი, თავი შეიკავონ შემოთავაზებული კანონმდებლობის მიღებისგან", — ვკითხულობთ განცხადებაში, რომელსაც ხელს აწერენ:

  • საერთაშორისო პრესის ინსტიტუტი (IPI)
  • ჟურნალისტების ევროპული ფედერაცია (EFJ)
  • მუხლი 19 ევროპა
  • პრესისა და მედიის თავისუფლების ევროპული ცენტრი (ECPMF)
  • OBC Transeuropa
  • შეუზღუდავი თავისუფალი პრესა (FPU)