მოკლედ: On.ge-ის ცესკოში უთხრეს, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ უწყებას 50 608 ხელმოწერა წარუდგინა.

  • მათი თქმით, "პარტიების საარჩევნო რეგისტრაციას არეგულირებს კანონი და დარეგისტრირდება ყველა, ვინც გაივლის კანონის მიერ დაწესებულ მოთხოვნებს."

დეტალები: "ამჟამად გრძელდება პროცედურები, საარჩევნო სუბიექტის რეგისტრაციისთვის კანონი ადგენს 10-დღიან ვადას. ყველა ეტაპის გავლის და რეგისტრაციის შემთხვევაში შესაბამისი ინფორმაცია გამოქვეყნებული იქნება ჩვენს ვებგვერდზე და იქნება საჯარო", — განმარტავს უწყება.

ცესკოსგან განსხვავებით, პრორუსმა კონსტანტინე მორგოშიამ ფეისბუქზე დაწერა, რომ 2024 წლის არჩევნებში მონაწილეობის მისაღებად საარჩევნო სუბიექტის სტატუსი უკვე მოიპოვეს "სისტემური ზეწოლის პირობებში."

  • კონსერვატიული პარტია, რომელიც პრორუსული, ძალადობრივი და ჰომოფობიურია, 2021 წლის შემდეგ, კვლავ ცდილობს მიიღოს ამომრჩევლის ხმები, ამჯერად — საპარლამენტო არჩევნებში.

მსგავსი: როგორ ემზადება ღიად პრორუსული "კონსერვატიული მოძრაობა" 2024 წლის არჩევნებისთვის — კვლევა

წინაისტორია: 2021 წლის 25 ნოემბერს, ადგილობრივი თვითმმართველობის არჩევნების დროს, ცესკომ კონსერვატიული მოძრაობის რეგისტრაცია შეაჩერა და მიზეზად დოკუმენტაციის შევსებისას დაშვებული რამდენიმე შეცდომა დაასახელა.

  • რეესტრის ინფორმაციით, ძალადობრივი ჯგუფის მიერ წარდგენილ სიას თან არ ერთოდა პირადობის მოწმობის ნომრები.
  • ამასთანავე, სარეგისტრაციოდ წარდგენილ წესდებასა და თანდართულ დოკუმენტებში პოლიტიკური გაერთიანების სახელწოდება არაერთგვაროვნად იყო მითითებული.

გაიგე მეტი: რა მიზეზით უთხრა რეესტრმა ალტ ინფოს უარი პარტიის რეგისტრაციაზე

ბოლო ხაზი: ალტ-ინფო 5-6 ივლისის ჰომოფობიური აქციის და ძალადობრივი მოვლენების ორგანიზატორი იყო.

  • ისინი ფიზიკურად გაუსწორდნენ 50-ზე მეტ ჟურნალისტს, დაარბიეს ოფისები და დევნეს აქტივისტები.
  • 5 ივლისს ნაცემი ოპერატორი ლექსო ლაშქარავა გარდაიცვალა.
  • დანაშაულის ორგანიზატორები არ დასჯილან და ახალ კანონსაწინააღმდეგო ქმედებებში მონაწილეობენ.
  • პირებს, რომლებსაც ბრალი ჰქონდათ წაყენებული, მინიმალური სანქციები შეეფარდათ.