მოკლედ: საქართველოს ეროვნული პლატფორმის 200-მდე ორგანიზაცია აცხადებს, რომ შეურაცხყოფილია ქართული ოცნების მიერ რუსული კანონის ხელახლა ინიციირებით და პლატფორმა პარლამენტთან მემორანდუმის მოქმედებას აჩერებს.

  • "ევროპისკენ მიმავალ გზაზე სვლას ჩვენ, როგორც ეროვნული პლატფორმის წევრი ორგანიზაციები დღემდე საქართველოს პარლამენტთან დიალოგითაც ვცდილობდით. სწორედ ამ მიზნით გავაფორმეთ თანამშრომლობის მემორანდუმი", — წერს პლატფორმა.

დეტალები: პლატფორმა აცხადებს, რომ ოცნების მიერ კანონპროექტის ხელახალი ინიციირება სახელმწიფო ინტერესებთან, კულტურასთან და ქართულ ტრადიციებთან შეუთავსებელია, ხოლო პირობის გატეხა — რუსეთის პოლიტიკისთვისაა დამახასიათებელი:

  • "ეწინააღმდეგება საქართველოს ევროინტეგრაციას და მისი მიღება საბოლოოდ დაასამარებს საქართველოს მოსახლეობის ისტორიულ მიზანს, გახდეს ევროკავშირის წევრი".

პლატფორმა მიმართავს: საქართველოს პარლამენტის თავმჯდომარეს — შალვა პაპუაშვილს, საქართველოს პრემიერ მინისტრს — ირაკლი კობახიძეს, ქართული ოცნების საპატიო თავმჯდომარეს — ბიძინა ივანიშვილს და მოითხოვს, მმართველმა გუნდმა კვლავ გაიწვიოს ინიციირებული კანონპროექტი:

  • "ჩვენ ურყევად დავიცავთ დემოკრატიას, თავისუფლებას, სამართლიანობას, თანასწორობას, საქართველოს ეროვნულ ინტერესებს და არავის მივცემთ უფლებას დაგვაკარგვინოს არაერთი თაობის ბრძოლით მონაპოვარი ევროპული მომავალი", — წერს პლატფორმა.

კონტექსტი: გუშინ, 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები და არასამთავრობო ორგანიზაციები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.

გაიგე მეტი: რატომ არის ქართული ოცნების კანონი რუსული — მოკლედ და მარტივად