მოკლედ: საქართველოს შინაგან საქმეთა სამინისტროს სასაზღვრო პოლიციის თანამედროვე, ახალი, ევროპული ტიპის H 145 ვერტმფრენი უკვე საქართველოშია.

  • ეს არის ერთ-ერთი იმ სამი სამაშველო ვერტმფრენიდან, რომელიც საქართველომ ფრანგულ კომპანია Airbus Helicopters-თან დადებული ხელშეკრულების თანახმად შეიძინა.
  • ხელშეკრულება 2022 წლის 19 დეკემბერს გაფორმდა.

დეტალები: შსს-ს ინფორმაციით, სასაზღვრო პოლიციის სპეციალური დანიშნულების ავიაციის დეპარტამენტის მფრინავებმა ვერტმფრენი გერმანიიდან საქართველოში ჩამოიყვანეს.

  • ახალი ბორტი სრულად დაკომპლექტებულია ხანძართან ბრძოლისა და სამთო-სამაშველო აღჭურვილობით.
ვერტმფრენი H 145

ვერტმფრენი H 145

ფოტო: შსს

რა მახასიათებლები აქვს ვერტმფრენს: როგორც შინაგან საქმეთა სამინისტრო წერს,

  • სამაშველო ვერტმფრენს აქვს 2 ძრავა, რაც ზრდის ფრენის უსაფრთხოებას, ასევე, განსხვავებული, ფენენსტრონის ტიპის კუდა ხრახნი.
  • იგი გაუმჯობესებულია, როგორც აეროდინამიკური, ასევე, ფრენის უსაფრთხოების თვალსაზრისით.
  • აღნიშნული ტიპის შვეულმფრენები მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, არსებულ ამოცანებთან სრულად თავსებადია.
ვერტმფრენი H 145

ვერტმფრენი H 145

ფოტო: შსს

სამინისტროს ინფორმაციით, სასაზღვრო პოლიციის სპეციალური დანიშნულების ავიაციის დეპარტამენტის მფრინავებმა და ბორტ-ტექნიკოსებმა თეორიული და პრაქტიკული მომზადება გერმანიაში, Airbus Helicopters-ის სასწავლო აკადემიაში გაიარეს.

  • H 145 ვერტმფრენი, ფრანგული კომპანია Airbus Helicopters-ის მიერ წარმოებული ერთ-ერთი უახლესი მოდელია, რომლის გადმოცემა გერმანიაში, Airbus Helicopters-ის საწარმოში განხორციელდა.
  • შემდეგი ორი ბორტის გადმოცემა ქართული მხარისთვის 2024 წლის ივნისამდე იგეგმება.