ეგეოსის ზღვაში, ბოდრუმის სიახლოვეს, გვიან ღამით, 6,9 მაგნიტუდის სიძლიერის მიწისძვრამ საბერძნეთის კუნძულ კოსზე და თურქეთის სანაპირო ზოლში, ნგრევასთან ერთად, სანაპიროების დატბროვა გამოიწვია.

შენობების ნგრევის შედეგად, კუნძულ კოსზე ორი ადამიანი დაიღუპა. ჯერჯერობით არ ვრცელდება ცნობები თურქეთში დაღუპულთა, ან დაშავებულთა შესახებ.

მიუხედავად იმისა, რომ ეპიცენტრში მიწისძვრის სიმძლავრე 6,9 მაგნიტუდა იყო, თურქეთის დასავლეთ სანაპიროებზე ის 6,2 მაგნიტუდამდე შემცირდა. სპეციალისტების თქმით, ბიძგების შესუსტება ზღვამ გამოიწვია, წინააღმდეგ შემთხვევაში, შედეგები გაცილებით კატასტროფული იქნებოდა.

მთავარ ბიძგებს არაერთი განმეორებითი ბიძგი მოჰყვა, მოსახლეობის ნაწილმა, ხელისუფლების მითითების შედეგად, ღამე ქუჩებში გაათია.

ტვიტერსა და ფეისბუკზე მიწისძვრის ზონაში მყოფმა ადამიანებმა არაერთი ფოტო-ვიდეო გამოაქვეყნეს, რომელზეც აღბეჭდილია როგორც მიწისძვრის მომენტი, ისე – მისი შედეგები.

თურქული მედიის ინფორმაციით, საბერძნეთის კურორტების გარდა, ბიძგები იგრძნობოდა თურქეთის კურორტებზეც, მათ შორის ანტალიაში, ბოდრუმში, მარმარისსა და იზმირშიც.