აჭარის ავტონომიური რესპუბლიკის ტურიზმისა და კურორტების დეპარტამენტი Euronews-ის არხებზე სარეკლამო მასალების განთავსებაში 195 530 ევრომდე დახარჯავს. შესაბამისი ხელშეკრულება აჭარის ტურიზმის დეპარტამენტსა და Euronews-ს შორის 2017 წლის 3 ივლისს გაფორმდა.

სარეკლამო მომსახურება განხორციელდება პოლონეთში, ისრაელში, ლიტვაში, ლატვიაში, ესტონეთში, ბელორუსში, რუსეთში, ყაზახეთში, უკრაინაში, არაბეთის გაერთიანებულ საამიროებში, საუდის არაბეთსა და ირანში.

ხელშეკრულებით გათვალისწინებულია:

  • 3 ივლისიდან 27 აგვისტომდე - აჭარის ტურიზმისა და კურორტების დეპარტამენტის მიერ მიწოდებული ვიდეო-რგოლის ჩვენება, რვა კვირის განმავლობაში ჯამში 128 გაშვება;
  • სექტემბრის პირველი ორი კვირის განმავლობაში - ექვსწუთიანი გადაცემა Metropolitan-ის 35 გაშვება ერთი კვირის განმავლობაში, ონლაინ რეპორტი ევრონიუსის ვებგვერდზე - Metropolitans-ის განყოფილებაში, ასევე Youtube-ის არხსა და მობილურ აპლიკაციაში;
  • სექტემბრის ორი კვირის განმავლობაში ოთხწუთიანი გადაცემა Cult-ის გაშვება 30-ჯერ, ვებგვერდზე ამავე გადაცემის განყოფილებაში ონლაინ-რეპორტის მომზადება, ასევე Youtube-ის არხსა და მობილურ აპლიკაციაში.

აჭარის ტურიზმის დეპარტამენტში აცხადებენ, რომ რეგიონი ტურისტებისთვის ოთხივე სეზონისთვისაა კურორტები, სარეკლამო კამპანიაც სწორედ ამის გამოა სექტემბერშიც.