მოკლედ: შინაგან საქმეთა მინისტრი ვახტანგ გომელაური აცხადებს, რომ თამაზ გინტურის გარდაცვალების შემდეგ, საოკუპაციო საზღვარი უფრო გააძლიერეს, თუმცა, "საქართველო კი არა, ბოლომდე ამერიკის შეერთებული შტატებიც ვერ იცავს საზღვარს".

  • ასე უპასუხა გომელაურმა დღეს, 20 მარტს, პარლამენტში "მინისტრის საათის" ფორმატში გამართულ სხდომაზე, დეპუტატ ნატო ჩხეიძის კითხვას — რატომ არ მიმდინარებს პატრულირება საოკუპაციო ხაზთან.

სტრიქონებს შორის: 2023 წლის 6 ნოემბერს, გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე, რუსმა ოკუპანტებმა საქართველოს მოქალაქე თამაზ გინტური მოკლეს.

დეტალები: გომელაურის თქმით, საოკუპაციო ხაზი ცხინვალის მიმართულებით, დაახლოებით 400 კილომეტრია და მისი "100%-იანი გადახურვა ფიზიკურად შეუძლებელია".

  • "კიდევ ერთხელ ვუსვამ ხაზს, ჩვენ კი არა, აშშ ვერ იცავს საზღვარს ბოლომდე, ეს ჩვეულებრივი მოვლენაა. მარტო აშშ კი არა ყველა, ბევრი, ევროპული და მათ შორის აზიური ქვეყნებიც", — განაცხადა მინისტრმა.
  • მისი თქმით, საზღვრების 100% მხოლოდ ჩინეთს აქვს ჩაკეტილი.
  • "მეტს, მსოფლიოში ერთ ქვეყანას ვერ დამისახელებთ, რომ საზღვრები 100%-ით დახურული აქვს, მით უმეტეს, საოკუპაციო ხაზი, სადაც ჩვენი მოქალაქეებიდან ზოგი იქით გადადის, ზოგს ნათესავი ჰყავს, ზოგი სასაფლაოზე გადადის, სამწუხაროდ, არ უშვებენ და აკავებენ. ეს პრობლემა დგას.
  • თქვენ თუ იცით, გამოსავალი, რომ ასე შეიძლება გაკეთდეს, სიამოვნებით მოგისმენდით", — მიმართა მინისტრმა ნატო ჩხეიძეს.

გაიგე მეტი: მკვლელობები შემცირდა, ნარკოდანაშაულის გამოვლენის მაჩვენებელი გაიზარდა — გომელაური

პრობლემაა, რომ საქართველოს ოკუპირებულ ტერიტორიებზე სისტემატურად ხდება:

  • ადამიანების გატაცება და უკანონო პატიმრობა;
  • განგრძობადი ბორდერიზაციით, არაერთმა ადგილობრივმა დაკარგა მიწა თუ სახლი, რომელიც ახალი ე.წ. "სასაზღვრო ნიშნების" აღმართვის შემდეგ, გამყოფი ხაზის მიღმა მიაქციეს ოკუპანტებმა;
  • მუდმივია დაშინებისა და შევიწროების შემთხვევები;
  • ხდება ეთნიკურად ქართველი მოსახლეობის მიზანმიმართული დისკრიმინაცია;
  • ადამიანებს უზღუდავენ მშობლიურ ენაზე განათლების მიღების უფლებას;
  • და ოკუპანტები ატარებენ რუსიფიკაციისა და მოსახლეობის ეთნიკური იდენტობის შეცვლის, მათი ასიმილაციისკენ მიმართულ პოლიტიკას.