მოკლედ: საპარლამენტო უმრავლესობის დეპუტატი ბექა ოდიშარია საქართველოს პრეზიდენტს სალომე ზურაბიშვილს მოუწოდებს "სახე შეინარჩუნოს" და "პრეზიდენტობის ვადის ამოწურვამდე, მოჩვენებით მაინც, თავი მიიტანოს ისეთ პრეზიდენტად, როგორც აირჩიეს ქართული ოცნების მხარდამჭერებმა".

  • ოდიშარია ამით გამოეხმაურა სალომე ზურაბიშვილის ფეისბუქ პოსტს.

რა მოხდა: გუშინ, 16 მარტს, სალომე ზურაბიშვილმა ფეისბუქის პირად გვერდზე გააზიარა ერთ-ერთი მედიასაშუალების მიერ გავრცელებული ინფორმაცია, ოკუპირებული აფხაზეთის ე.წ. მოსამართლეების გადაწყვეტილებაზე, რომლებმაც ბიჭვინთის აგარაკების მესამე პირისთვის გადაცემის აკრძალვის შესახებ კანონის გაუქმებას მხარი არ დაუჭირეს.

  • ზურაბიშვილმა გაზიარებულ ინფორმაცია ასე დაასათაურა — "დამოუკიდებლობის მაგალითი აფხაზ მოსამართლეებისგან".

სტრიქონებს შორის: 2023 წლის 27 დეკემბერს, ოკუპირებული აფხაზეთის ე.წ. პარლამენტმა რუსეთისთვის ბიჭვინთის აგარაკების გადაცემის შეთანხმების რატიფიცირება მოახდინა. შეთანხმება სხვადასხვა ობიექტების, მიწის ნაკვეთებისა და შენობების მესამე პირებისთვის გადაცემას კრძალავს. გუშინ, 16 მარტს, RESPUBLICA-ს ტელეგრამის არხზე გავრცელდა ინფორმაცია, რომ აფხაზეთის ე.წ. სასამართლომ ბიჭვინთის აგარაკების მესამე პირებისთვის გადაცემის აკრძალვის შესახებ კანონის გაუქმებას მხარი არ დაუჭირა.

გუშინვე, პრეზიდენტის ამ პოსტს საპარლამენტო უმრავლესობის წევრი გურამ მაჭარაშვილი გამოეხმაურა.

  • რა თქვა გურამ მაჭარაშვილმა: პრეზიდენტის პოსტი შეაფასა, როგორც "ტერიტორიული მთლიანობის აღდგენის წინააღმდეგ გადადგმულ ნაბიჯი" და აღნიშნა, რომ ზურაბიშვილი, თავისი განცხადებით, პრაქტიკულად, აფხაზეთის დამოუკიდებლობას აღიარებს.
  • "ჩვენ გვინდა, რომ მშვიდობიანი გზით აღვადგინოთ ტერიტორიული მთლიანობა და ამ დროს არაღიარების პრინციპის წინააღმდეგ გამოდის [სალომე ზურაბიშვილი] და პრაქტიკულად, თავისი განცხადებით აღიარებს აფხაზეთის დამოუკიდებლობას. ეს არის სამწუხარო მოცემულობა, მაგრამ არ გვიკვირს, იმიტომ, რომ ზურაბიშვილი უკვე ღიად და აშკარად ასრულებს უცხოური ძალების დაკვეთებს", — თქვა მაჭარაშვილმა.

მოგვიანებით, პრეზიდენტის ადმინისტრაციამ განაცხადა, რომ "ოკუპირებულ აფხაზეთში ე.წ. სასამართლოს მიერ ბიჭვინთის აგარაკების მესამე პირებისათვის გადაცემის აკრძალვის შესახებ კანონის არგაუქმების გადაწყვეტილებაზე, პრეზიდენტის სიტყვების ინტერპრეტირება არის საზოგადოების შეგნებულად შეცდომაში შეყვანა და პრეზიდენტის დისკრედიტაციის კიდევ ერთი მცდელობა".