მოკლედ: ნოვაია გაზეტა ევროპას ინფორმაციით, რუსეთში, სადაც საპრეზიდენტო არჩევნები მიმდინარეობს, ბოლო ერთ დღეში, საარჩევნო პროცესის ხელის შეშლის მუხლით, სულ მცირე, 15 სისხლის სამართლის საქმე აღიძრა.

  • მუხლი 5 წლამდე თავისუფლების აღკვეთას ითვალისწინებს.

დეტალები: ნოვაია გაზეტას ევროპას მიხედვით, მოქალაქეების მიმართ სისხლის სამართლის საქმე აღიძრა საარჩევნო უბნებზე ცეცხლის წაკიდების, საარჩევნო ყუთების და ბიულეტენების საღებავით დაზიანების გამო.

  • ორი სისხლის სამართლის საქმე აღიძრა მოსკოვში, სამი — ვორონეჟის ოლქში და თითო სანქტ-პეტერბურგში, როსტოვისა და ვოლგოგრადის რაიონებში და რუსეთის სხვა ქალაქებსა და რეგიონებში.

კონტექსტი: 15, 16 და 17 მარტს რუსეთში საპრეზიდენტო არჩევნები იმართება.

  • საარჩევნო უბნები კამჩატკის ნახევარკუნძულზე, რუსეთის უკიდურესი აღმოსავლეთით მდებარე რეგიონში, 15 მარტს, ადგილობრივი დროით 08:00 საათზე გაიხსნა და საბოლოოდ, დაიხურება უკიდურესი დასავლეთით მდებარე კალინინგრადის ანკლავში კვირას, 20:00 საათზე.
  • საპრეზიდენტო არჩევნების კენჭისყრის შედეგად, ეჭვგარეშეა, რომ ვლადიმირ პუტინი ხელისუფლებაში ყოფნას კიდევ 6 წლით გაახანგრძლივებს.

რა ვიცით საარჩევნო პროცესზე: საპრეზიდენტო არჩევნების 3-დღიანი კენჭისყრის პირველი დღის შემდეგ, რადიო თავისუფლების კავკასიის ბიუროს თანახმად, სამხრეთ რუსეთისა და ჩრდილოეთ კავკასიის რეგიონებში არჩევნები დარღვევებით ჩატარდა და არაერთი ინციდენტი დაფიქსირდა საარჩევნო უბნებზე;

  • ამომრჩეველთა აქტივობამ მნიშვნელოვნად გადააჭარბა რუსეთის საშუალო მაჩვენებელს, მაგალითად, ჩეჩნეთში, სადაც აქტივობა თითქმის ორმაგია — წერს გამოცემა.
  • მედია ერთ-ერთი ყველაზე ხშირი დარღვევის ფაქტად ასახელებს საარჩევნო უბნებზე განთავსებულ პუტინის პორტრეტებს.

გაიგე მეტი: საარჩევნო უბნები გაიხსნა — რუსეთი პუტინს "ირჩევს"

ბოლო ხაზი: რუსული მედია იუწყება, რომ რუსეთის საპრეზიდენტო არჩევნების კენჭისყრის პროცესის დამკვირვებლები საქართველოდანაც ჩავიდნენ.

გაიგე მეტი: ვინ ჩავიდნენ საქართველოდან რუსეთში, საპრეზიდენტო არჩევნებზე დასაკვირვებლად