რა ხდება: საქართველოს საგარეო საქმეთა სამინისტროში On.ge-ს დაუდასტურეს, რომ მექსიკის საზღვართან საქართველოს მოქალაქეები გაიტაცეს.

  • "საელჩო კავშირზეა მექსიკის საიმიგრაციო სამსახურთან დამატებითი ინფორმაციის მიღების მიზნით და არკვევს მოქალაქეთა შესაძლო ადგილსამყოფელს.
  • საელჩო კავშირზე რჩება მოქალაქეთა ოჯახის წევრებთან, მათთან, ვინც მიმართა საელჩოს ოჯახის წევრის ადგილსამყოფლის დადგენის მიზნით", — გვითხრეს უწყებაში.

On.ge-ს კითხვაზე, არის თუ არა დაზუსტებული, საქართველოს რამდენი მოქალაქეა გატაცებული, სამინისტროდან გვიპასუხეს, რომ რაოდენობას აზუსტებენ.

ვის უნდა დაუკავშირდეთ, თუ თქვენი ახლობლის შესახებ ინფორმაციის გადამოწმება გსურთ: ამისთვის უნდა მიმართოთ საქართველოს საელჩოს მექსიკაში, ნომრით +52 55 55 200 118, ან ელექტრონული ფოსტით — [email protected]

რა გაარკვია მედიამ: ფორმულა იუწყება, რომ ქართველები, რომლებიც აშშ-ში შესვლას არალეგალურად გეგმავდნენ, კრიმინალური ჯგუფის ხელში აღმოჩნდნენ.

  • არსებული ინფორმაციით, მექსიკურ ნარკოკარტელს 30-მდე ქართველი მძევლად ჰყავს აყვანილი, — აცხადებს ტელეარხი.
  • ფორმულა, გატაცებულთა ახლობლის მონათხრობზე დაყრდნობით წერს, რომ ტყვეობაში მყოფებზე ფიზიკურად ძალადობენ და გამოსასყიდს ითხოვენ. მისი თქმით, ფულს ნარკოკარტელი ე.წ. გადამყვანისგან ითხოვს.
  • ამ დეტალების შესახებ საგარეო საქმეთა სამინისტროში ამ დროისთვის არ დაუდასტურებიათ.