რა ხდება: თბილისის მერი, კახა კალაძე, A კატეგორიის ტაქსის ნებართვის მფლობელებს მოუწოდებს, ნებართვები 1-ელ აპრილამდე გააქტიურონ.

  • მერის თქმით, წინააღმდეგ შემთხვევაში, ისინი ავტომატურად გაუქმდება.

დეტალები: კახა კალაძის განცხადებით, მესაკუთრეები, ვისაც აღნიშნული ნებართვების შენარჩუნების სურვილი აქვთ, ნებართვების გააქტიურების შესახებ ინფორმაციას ვებგვერდზე - taxi.tbilisi.gov.ge და ასევე, თბილისის მერიის ცხელ ხაზზე მიიღებენ.

რას ნიშნავს A კატეგორიის ტაქსი: ამ კატეგორიის ლიცენზიის მქონე მძღოლები ვალდებულები არიან, ტაქსები თეთრად გადაღებონ და ეს კატეგორია ითვალისწინებს მოთხოვნას, მარცხენა საჭიანი იყოს ავტომობილი.

მუნიციპალური სერვისების განვითარების სააგენტოს მიხედვით,

  • A კატეგორიის ლიცენზია ტაქსის მძღოლებს უზრუნველყოფს: უფასო საპარკინგე ადგილებით, ქუჩიდან მგზავრის აყვანის უფლებითა და ავტობუსის ხაზში მგზავრის აყვანის და გადმოსმის უფლებით.

კალაძის განცხადებიდან: "ტაქსების რეფორმა ჩვენთვის ძალიან მნიშვნელოვანია. ამ მიმართულებით რამდენიმე ეტაპი უკვე განხორციელდა. მინდა, კიდევ ერთხელ შევახსენო A კატეგორიის ტაქსის ნებართვის მფლობელებს, რომ თუ ჯერ კიდევ არ გაგიაქტიურებიათ ნებართვა, ის 1-ელ აპრილამდე გაააქტიურეთ. გასული წლის პირველი აპრილიდან ეს ნებართვები ტაქსის მფლობელებს საკუთრებაში გადავეცით, რომელიც გააქტიურებისთვის ერთწლიან ვადას ითვალისწინებდა. აღნიშნული ვადა უკვე იწურება. შესაბამისად, იჩქარეთ. წინააღმდეგ შემთხვევაში, ნებართვები გაუქმდება და მისი აღდგენა შეუძლებელი იქნება."

ბოლო ხაზი: კანონი ტაქსების ლიცენზირების შესახებ ძალაში შევიდა 2018 წლის 1 ოქტომბრიდან. და ტაქსების A და B კატეგორიებად დაყოფას გულისხმობს.

  • B კატეგორიას მიაკუთვნებენ ტაქსებს, რომელიც შეიძლება იყოს ნებისმიერი ფერის და შეკვეთას აპლიკაციის ან სატელეფონო შეტყობინების საფუძველზე იღებდეს.